'వ్యాక్సిన్ తీసుకున్నవారికి ఎలాంటి ఇబ్బందులు లేవు'

జిల్లాలో ఇప్పటివరకు కరోనా వ్యాక్సిన్ తీసుకున్నవారికి ఎలాంటి ఇబ్బందులు లేవని భద్రాద్రి కొత్తగూడెం జిల్లా జాయింట్ కలెక్టర్ ఎల్. వెంకటేశ్వర్లు స్పష్టం చేశారు. పంపిణీ కార్యక్రమం ​ప్రశాంతంగా కొనసాగుతుందన్నారు. భద్రాచలం ప్రభుత్వ ఆస్పత్రిలో జరుగుతున్న వ్యాక్సిన్ పంపిణీ కార్యక్రమాన్ని ఆయన పరిశీలించారు.

జిల్లా వ్యాప్తంగా ప్రభుత్వ, ప్రైవేటు ఆస్పత్రుల్లో పనిచేస్తున్న 8540మంది హెల్త్ వర్కర్లకు కరోనా వ్యాక్సిన్​ పంపిణీ జరుగుతున్నట్లు భద్రాద్రి కొత్తగూడెం జిల్లా జాయింట్ కలెక్టర్ ఎల్. వెంకటేశ్వర్లు పేర్కొన్నారు. భద్రాచలం ప్రభుత్వ ఆస్పత్రిలో జరుగుతున్న వ్యాక్సిన్ పంపిణీ కార్యక్రమాన్ని ఆయన పరిశీలించారు. కేటాయించిన ప్రతి ఒక్కరికి తప్పనిసరిగా వాక్సిన్​ ఇవ్వాలని ఆస్పత్రి సూపరిండెంట్​ను ఆదేశించారు.

జిల్లాలో ఈనెల 16న ప్రారంభమైన కరోనా వ్యాక్సిన్​ పంపిణీలో.. మొదటిరోజు 120, రెండో రోజు (18వ తేది) 700మందికి వ్యాక్సిన్​ ఇచ్చినట్లు వెంకటేశ్వర్లు పేర్కొన్నారు. నేడు జిల్లాలోని అన్ని కేంద్రాల్లో(44).. ఒక్కొక్క కేంద్రానికి 100చొప్పున మొత్తం 4400మందికి వ్యాక్సిన్ పంపిణీ చేస్తున్నట్లు స్పష్టం చేశారు.

గర్భిణీలు, బాలింతలు, దీర్ఘకాలిక వ్యాధులున్న వారిని.. వ్యాక్సిన్​ పంపిణీ కార్యక్రమం నుంచి మినహాయించినట్లు వెంకటేశ్వర్లు పేర్కొన్నారు. జిల్లాలో ఇప్పటివరకు వ్యాక్సిన్ తీసుకున్నవారికి ఎలాంటి ఇబ్బందులు లేవన్నారు. ఎదైనా ఇబ్బంది ఎదురైతే.. ఆయా కేంద్రాల్లో ఏర్పాటు చేసిన ప్రత్యేక విభాగాన్ని సంప్రదించాలని సూచించారు.

ప్రభుత్వ ఆదేశాలనుసారం.. తదుపరి పంచాయతీ వర్కర్స్​కు వ్యాక్సిన్ పంపిణీ కార్యక్రమం చేపడతామని వెంకటేశ్వర్లు తెలిపారు. ప్రజలు వాక్సిన్​పై ఎలాంటి ఆందోళనకు గురి కావొద్దని పేర్కొన్నారు.

ఇదీ చదవండి: కరోనా టీకాపై మీ డౌట్స్​ ఇవేనా?