సెరెనాకు షాక్​- యూఎస్​ ఓపెన్​ గెలిచిన ఆండ్రిస్కూ

టెన్నిస్​ యువ కెరటం ఆండ్రిస్కూ సంచలనం సృష్టించింది. దిగ్గజ క్రీడాకారిణి సెరెనా విలియన్స్​ను ఓడించి యూఎస్​ ఓపెన్​ను కైవసం చేసుకుందీ 19 ఏళ్ల యువ సంచలనం. ఫైనల్స్​లో 6-3, 7-5తో విజయాన్ని అందుకుని తొలి టైటిల్​ను ముద్దాడింది ఆండ్రిస్కూ.

అమెరికన్​ టెన్నిస్​ దిగ్గజం సెరెనా విలియమ్స్​కు షాక్​. యూఎస్​ ఓపెన్​ ఫైనల్స్​లో కెనెడియన్​ సంచలనం బియాంక ఆండ్రిస్కూ చేతిలో ఘోర పరాజయం పాలైంది సెరెనా. 6-3, 7-5 వరుస సెట్లల్లో విజయం అందుకున్న 19 ఏళ్ల ఆండిస్కూ.. మ్యాచ్​ ఆరంభం నుంచే సెరెనాపై పట్టు సాధించింది.

ట్రోఫీతో ఆండ్రిస్కూ

ఫైనల్స్​లో విజయంతో టెన్నిస్​ చరిత్రలో అత్యధిక టైటిళ్లు గెలిచిన క్రీడాకారిణిగా మార్గరెట్​ కోర్ట్​ రికార్డు(24 టైటిళ్లు)ను సమం చేద్దామనుకున్న సెరెనా కల నెరవేరలేదు. 24వ గ్రాండ్​స్లామ్​ గెలుపుపై ధీమాతో బరిలోకి దిగిన సెరెనాను కళ్లుచెదిరే ఆటతో కట్టిపడేసింది ఆండ్రిస్కూ. గతంలో ఎన్నడూ గ్రాండ్​స్లామ్​ రెండో రౌండ్​ కూడా దాటని ఆండ్రిస్కూ... దిగ్గజ క్రీడాకారిణిని ఓడించి తొలి టైటిల్​ను ముద్దాడింది. గ్రాండ్​స్లామ్​ గెలిచిన తొలి కెనేడియన్​ మహిళగా ఆండ్రిస్కూ రికార్డు సృష్టించింది. సెరెనా తన తొలి యూఎస్​ ఓపెన్​ టైటిల్​ (1999) గెలిచినప్పుడు ఆండ్రిస్కూ పుట్టనేలేదు.