టోక్యో ఒలింపిక్స్​ వ్యయం భారీగా పెరగనుందా?

కరోనా వల్ల ప్రతిష్ఠాత్మక టోక్యో ఒలింపిక్స్​ వచ్చే ఏడాది జరగనున్నాయి. దీనివల్ల నిర్వహణ వ్యయం భారీగా పెరగనున్నట్లు తెలుస్తోంది. ఈ నేపథ్యంలో ఈ విశ్వక్రీడల నిర్వహణకు వ్యయం ఎంత? ఆతిథ్య టోక్యోలో ప్రస్తుత పరిస్థితి ఎలా ఉంది?

క్రీడలు, సినిమా ఇంకా తదితర ఏ కార్యక్రమమైనా వాయిదా పడేకొద్దీ నిర్వహణ వ్యయం పెరిగిపోతుంది. సరైన సమయానికి జరపకపోతే భారీ మొత్తంలో ఖర్చు భరించాల్సి ఉంటుంది. ఇందుకు టోక్యో ఒలింపిక్స్​ మినహాయింపు కాదు. ఈ ఏడాది నిర్వహించాల్సిన ఈ క్రీడలు.. కరోనా కారణంగా వచ్చే ఏడాదికి వాయిదా పడ్డాయి. దీంతో వాటి నిర్వహణ ఖర్చులు భారీగా పెరిగిపోయినట్లు తెలుస్తోంది. ఈ నేపథ్యంలో ఒలింపిక్స్ వ్యయం ఎంత? వచ్చే ఏడాదైనా క్రీడల్ని నిర్వహిస్తారా? ఐఓసీ విధులు ఏంటి? లాంటి అంశాల సమాహారమే ఈ కథనం.

2.8 బిలియన్​ డాలర్లు ఎక్కువ!

టోక్యో ఒలింపిక్స్‌ అధికారిక ఖర్చు 12.6 బిలియన్‌ డాలర్లు. కానీ వ్యయం అంతకు రెండింతలు ఉండొచ్చని గతేడాది ప్రభుత్వ ఆడిట్‌లో తేలింది. అయితే ఈసారి ఒలిపింక్స్​ ఖర్చు సాధారణ వ్యయం కన్నా 2.8 బిలియన్​ డాలర్లు పెరగడం ఖాయమని తెలుస్తోంది.

ఒలింపిక్స్​ నిర్వహణకు ఎందుకింత వ్యయం?

1960 నుంచి ఒలింపిక్స్​ బడ్జెట్​ ప్రతి ఏడాది సగటున 172 శాతం పెరుగుతోంది. 2012లో ఈ మెగా క్రీడల నిర్వహణకు 7.3 బిలియన్​ డాలర్ల వ్యయమవగా.. ప్రస్తుతం 25 బిలియన్ డాలర్లు ఖర్చయ్యేలా కనిపిస్తోంది. ఎప్పటికప్పుడు ఆధునిక హంగులతో పోటీలు జరపడమే ఇందుకు కారణంగా తెలుస్తోంది. నిర్వహణ ఖర్చులు అనుకున్న దానికన్నా ఎక్కువ అయినప్పుడు ఐఓసీ ఆ మొత్తాన్ని భరించదు. దీంతో స్థానిక నిర్వాహకులు, ప్రభుత్వాలపై ఆ వ్యయం పడుతుంది.

ఐఓసీ బాధ్యత ఏమిటి?

అంతర్జాతీయ ఒలింపిక్ కమిటీ(ఐఓసీ) లాభాపేక్షలేని సంస్థ. స్విట్జర్లాండ్​లో సంస్థ ప్రధాన కార్యాలయం ఉంది. ఒలింపిక్స్​ను ప్రోత్సాహించడం, ప్రపంచ క్రీడలను అభివృద్ధి చేయడం దీని బాధ్యత. ప్రస్తుత నివేదిక ప్రకారం.. ప్రసార హక్కులను అమ్మడం ద్వారా 73 శాతం ఆదాయం, స్పాన్సర్​షిప్​లను విక్రయించడం ద్వారా 18 శాతం ఆదాయం వచ్చినట్లు వెల్లడించింది. మొత్తంగా 2013-16లో 5.7 బిలియన్​ డాలర్లు ఆర్జించినట్లు స్పష్టం చేసింది. క్రీడల అభివృద్ధి కోసం ఈ మొత్తంలో 90 శాతం తిరిగి ఖర్చు చేసినట్లు తెలిపింది.

జపాన్​లో ఒలింపిక్స్​ నిర్వహణపై స్పందన?

డిసెంబరు 11-13 తేదీల్లో జరిపిన సర్వే ప్రకారం.. 63 శాతం మంది పోటీలు వాయిదా లేదా రద్దవుతాయని భావిస్తున్నారు. 27 శాతం మంది జరుగుతాయని అభిప్రాయపడ్డారు. అక్టోబరులో నిర్వహించిన సర్వే ప్రకారం 40 శాతం మంది జరుగుతాయని, 48 శాతం మంది వాయిదా లేదా రద్దవుతాయని అన్నారు.

ప్రస్తుతం టోక్యో, జపాన్​లో కరోనా ప్రభావం?

అత్యధికంగా కేసులు నమోదవుతున్న అమెరికాతో పోలిస్తే జపాన్​లో తక్కువ కేసులే వస్తున్నాయి. అయితే నవంబరు నుంచి రోజురోజుకు దేశంలో పాజిటివ్​ కేసుల సంఖ్య పెరుగుతోంది. వచ్చే మార్చిలో వ్యాక్సిన్​ అందుబాటులోకి వస్తుందని అక్కడి ప్రభుత్వం భావిస్తోంది.