టోక్యో ఒలింపిక్స్ను వచ్చే ఏడాదికి వాయిదా వేయడం వల్ల రూ.20 వేల కోట్ల మేర ఖర్చు పెరిగే అవకాశం ఉందని నిర్వాహక కమిటీ తెలిపింది. శుక్రవారం జరిగిన సమావేశంలో టోక్యో సిటీ, జపాన్ ప్రభుత్వంతో చర్చలు జరిపిన ఒలింపిక్ నిర్వాహక కమిటీ ఖర్చుల అంచనాను ప్రకటించింది.
ఖర్చులో వాటా
ఈ ఏడాది జరగాల్సిన ఒలింపిక్స్ కరోనా ప్రభావంతో.. వచ్చే జులై 23న జరపనున్నట్లు ఇప్పటికే ప్రకటించారు. ఈ నేపథ్యంలో టోర్నీ నిర్వహణకు అయ్యే ఖర్చుతో పాటు ఇతర అంశాల గురించి శుక్రవారం జరిగిన సమావేశంలో చర్చించారు. అదనపు ఖర్చుల్లో మూడింట రెండొంతులను ఇరు ప్రభుత్వ సంస్థలు భరించనున్నాయి. మిగిలిన ఒక వంతు ఖర్చుకు ప్రైవేట్ నిధుల ఆర్గనైజింగ్ కమిటీ బాధ్యత వహిస్తుంది.
ఒలింపిక్స్ ఆలస్యం కారణంగా 171 బిలియన్ యెన్లు అంటే దాదాపుగా రూ.12 వేల కోట్లు ఖర్చు అయినట్లు తెలుస్తోంది. ఈ ఖర్చులను నిర్వాహక కమిటీతో పాటు టోక్యో ప్రభుత్వం సమంగా భరించనుండగా.. జపాన్ ప్రభుత్వం కొంత మొత్తంలో సాయం చేయనుంది.
అంచనాను మించిన ఖర్చు
2013లో ఒలింపిక్స్ నిర్వహణ వేలంలో జపాన్ గెలిచినప్పుడు రూ. 53 వేల కోట్ల ఖర్చవుతుందని ఆ దేశ ప్రభుత్వం తెలిపింది. టోక్యో ఒలింపిక్స్ వాయిదా వేయడానికి ముందు అప్పటికే రూ.90 వేల కోట్లను ఖర్చు పెట్టినట్లు వెల్లడించింది. కానీ, గతేడాది జపాన్ ప్రభుత్వం లెక్కల్లో అనుకున్న దాని కంటే రెండింతలు ఎక్కువ ఖర్చు అయినట్లు తెలుస్తోంది. రెండు నెలల క్రితం ఆక్స్ఫర్డ్ విశ్వవిద్యాలయం చేసిన అధ్యయనంలో ఈసారి జరగబోయే మెగా క్రీడలు అత్యంత ఖరీదైన వేసవి ఒలింపిక్స్ అని తెలిపింది.
