వచ్చే ఏడాది బర్మింగ్హామ్లో నిర్వహించ తలపెట్టిన కామన్వెల్త్ క్రీడలు.. అనుకున్న సమయం ప్రకారం జరుగుతాయని కామన్వెల్త్ క్రీడా సమాఖ్య (సీజీఎఫ్) విశ్వాసం వ్యక్తం చేసింది. కరోనా కొత్త స్ట్రెయిన్ ఉద్ధృతి కారణంగా నిర్వహణపై ఏమీ చెప్పలేమని ఇటీవల అన్నారు ఆతిథ్య నగర కౌన్సిల్ నేత ఇయాన్ వార్డ్. దీంతో కార్యక్రమ నిర్వహణపై సందిగ్ధత నెలకొంది. ఈ నేపథ్యంలో షెడ్యూల్ ప్రకారమే జులై 28 నుంచి ఆగస్టు 8 వరకు పోటీలు జరుగుతాయని సీజీఎఫ్ సీఈఓ డేవిడ్ గ్రీవెంబర్గ్ స్పష్టతనిచ్చారు.
"ప్రణాళిక ప్రకారమే 2022 కామన్వెల్త్ క్రీడలు జరుగుతాయని సీజీఎఫ్ విశ్వసిస్తోంది. అది కొవిడ్ అనంతర ఐరోపాలో కీలక పాత్ర పోషిస్తుంది. ఇంకా 18 నెలల సమయం ఉన్నందున మారుతున్న పరిస్థితులకు అనుగుణంగా చర్యలు తీసుకుంటాం. అందుకోసం ప్రభుత్వంతో అన్ని స్థాయిల్లో, ఎన్జీవోలు, ఈవెంట్ నిర్వాహకులతో కలిసి పనిచేస్తున్నాం. భారీ స్థాయిలో కార్యక్రమం నిర్వహించాల్సి ఉన్నందున ప్రత్యేక బృందాలను ఏర్పాటు చేశాం. వారు విధాన, వైద్య పరమైన సహకారం అందిస్తారు."
-డేవిడ్ గ్రీవెంబర్గ్, సీజీఎఫ్ సీఈఓ