జాతి వివక్ష, జాతి విద్వేషాన్ని సహించే ప్రసక్తే లేదని ఐపీఎల్‌ ఫ్రాంచైజీ కోల్కతా నైట్రైడర్స్(Kolkata Knight riders) ప్రకటించింది. జట్టు ఆటగాళ్లు ఇలాంటి వ్యాఖ్యలు చేస్తే ఊరుకొనే ప్రసక్తి లేదని వెల్లడించింది. పూర్తి సమాచారం తెలిశాక ఇయాన్‌ మోర్గాన్(Eoin Morgan), బ్రెండన్‌ మెక్కలమ్ వ్యవహారంపై స్పందిస్తామని తెలిపింది.
భారతీయ యువ ఆటగాళ్లను కించపరుస్తూ మోర్గాన్, మెక్ కలమ్, జోస్‌ బట్లర్(Jos Buttler) చేసిన పాత ట్వీట్లు ప్రస్తుతం దుమారం రేపాయి. యువకుడిగా జాతి విద్వేష, స్త్రీవివక్ష ట్వీట్లు చేశాడన్న ఆరోపణలపై కొత్త ఆటగాడు ఓలీ రాబిన్‌సన్‌ను ఈసీబీ సస్పెండ్‌ చేసింది. 2018లో 'సర్‌' అంటూ భారతీయులు యాస, భాషను ఎగతాళి చేస్తూ మోర్గాన్, బట్లర్ చేసిన ట్వీట్లు చక్కర్లు కొట్టాయి. దాంతో వారిపైనా కఠిన చర్యలు తీసుకోవాలన్న డిమాండ్లు మొదలయ్యాయి. ఈ నేపథ్యంలోనే దీనిపై స్పందించిన ఈసీబీ వారిద్దరిని విచారిస్తోంది. ఈ క్రమంలోనే కేకేఆర్ కూడా స్పందించింది.