Panth T20worldcup: అందుబాటులో ఉన్న అవకాశాలను సద్వినియోగించుకొని టీ20 ప్రపంచకప్లో సత్తా చాటేందుకు టీమ్ ఇండియా కృషి చేస్తోందని భారత వికెట్ కీపర్ రిషభ్ పంత్ తెలిపాడు. మెగాటోర్నీలో భారత జట్టు బాగా రాణిస్తుందని ఆశాభావం వ్యక్తం చేశాడు. వెస్టిండీస్తో జరిగిన రెండో టీ20 మ్యాచ్ అనంతరం ఓ ఇంటర్వ్యూలో ఈ వ్యాఖ్యలు చేశాడు.
"ప్రపంచకప్ కోసం ఇంకా సమయం ఉంది. ఈ నేపథ్యంలో మాకు అందుబాటులో ఉన్న అవకాశాల్ని పరిశీలిస్తున్నాం. ఆటగాళ్లు ఎవరెవరు ఏ స్థానంలో ఉండాలి, దాని వల్ల జట్టుకు ఎంత లాభం అనేది చూస్తున్నాం." అని చెప్పాడు.
వెస్టిండీస్తో జరిగిన రెండో టీ20లోని చివరి ఓవర్లో హర్షల్ పటేల్ బౌలింగ్లో పొవెల్ ధనాధన్ సిక్స్లు బాదాడు. దీని గురించి మాట్లాడుతూ.. "బుమ్రా, మహ్మద్ షమీ గైర్హాజరిలో జట్టులోకి వచ్చిన అర్షల్ పటేల్ చివరి ఓవర్లలో బౌలింగ్ వేశాడు. సిక్స్లు బాదిన పొవెల్కు ఆఫ్స్టంప్ అవతల బంతుల్ని వేయడం మా ప్రణాళిక. ఈ మ్యాచ్లో సహజంగానే మాపై ఒత్తిడి ఉంది. కానీ మేము ఎక్కువగా ఆలోచించకుండా మా నైపుణ్యాలపై దృష్టి పెట్టాం" అని పంత్ అన్నాడు.
హార్దిక్ పాండ్యా స్థానంలో జట్టులోకి వెంకటేశ్ అయ్యర్ మంచి ఫినిషర్ అని అన్నాడు పంత్. అతడు పరిపక్వత చెందిన ఆటగాడని, ఏ స్థానంలోనైనా బ్యాటింగ్ చేయగల సమర్థుడని ప్రశంసించాడు. కొత్తగా జట్టులోకి వచ్చిన ఆటగాళ్లలో ఆత్మవిశ్వాసం నింపడం ముఖ్యమని పేర్కొన్నాడు.
ఇదీ చదవండి:టీ20ల్లో రోహిత్ రికార్డును సమం చేసిన కోహ్లీ
