Dhoni Chapell: ప్రతి జట్టులోనూ మహేంద్రసింగ్‌ ధోనీ లాంటి సహజ ప్రతిభావంతులైన క్రికెటర్లు ఉండాలని ఆస్ట్రేలియా మాజీ కెప్టెన్ గ్రెగ్ ఛాపెల్ అన్నాడు. సహజ వాతావరణంలో ఆట నేర్చుకునేవాళ్లే ఎక్కువ కాలం నిలబడతారని.. ధోనీ అలాంటి ఆటగాడే అని.. అలాంటి ఆటగాళ్లు తగ్గిపోతుండటం వల్లే వివిధ జట్లు ఇబ్బంది పడుతున్నాయని చాపెల్‌ అభిప్రాయపడ్డాడు.
"అభివృద్ధి చెందిన క్రికెట్‌ దేశాలు క్రమంగా సహజ వాతావరణాన్ని కోల్పోతున్నాయి. యువ క్రికెటర్లు ప్రధానంగా ఎదిగేది ఆ వాతావరణం నుంచే. బాగా ఆడే ఆటగాళ్లను చూస్తూ.. కుటుంబ సభ్యులు, క్రికెటర్లతో సరదాగా గడుపతూ ఆట నేర్చుకుంటారు. భారత ఉపఖండంలో ఇంకా అలాంటి వాతావరణం ఉంది. చిన్న పట్టణాల్లో శిక్షణ సౌకర్యాలు తక్కువ. అక్కడ వీధుల్లో, ఖాళీగా ఉండే పొలాల్లో ఎక్కువగా క్రికెట్‌ ఆడుతుంటారు. సంప్రదాయ కోచింగ్‌ పద్ధతుల్ని వారు పాటించరు. ప్రస్తుత స్టార్లు చాలామంది అలా ఆట నేర్చుకున్న వాళ్లే. ధోనీ ఇందుకు సరైన ఉదాహరణ. తన ప్రతిభ, శైలి తనకు తాను తెచ్చుకున్నవే. భారత జట్టులోకి వచ్చాక సీనియర్ల నుంచి, అలాగే పరిస్థితుల నుంచి నేర్చుకుని తన నైపుణ్యాలను పెంచుకున్నాడు. నాకు తెలిసిన అత్యంత చురుకైన క్రికెట్‌ బుర్రల్లో అతడిది ఒకటి" అని చాపెల్‌ పేర్కొన్నాడు. ఇటీవల యాషెస్‌ సిరీస్‌లో ఇంగ్లాండ్‌ చిత్తుగా ఓడిపోవడానికి కూడా.. సహజ వాతావరణం క్రికెట్‌ నేర్చుకున్న ఆటగాళ్లు జట్టులో లేకపోవడమే కారణమని గ్రెగ్ అభిప్రాయపడ్డాడు.
ఇద్దరికే ఆ సత్తా ఉంది
Ravichandran Ashwin Shanewarne: ఇద్దరు స్పిన్నర్లకు మాత్రమే టెస్టుల్లో 1000 వికెట్లు తీయగల సత్తా ఉందని ఆస్ట్రేలియా దిగ్గజం షేన్‌వార్న్‌ అభిప్రాయపడ్డాడు. అందులో ఒకరు టీమ్‌ఇండియా ఆఫ్‌ స్పిన్నర్ రవిచంద్రన్ అశ్విన్‌ కాగా.. మరొకరు ఆసీస్‌కు చెందిన నాథన్‌ లియాన్ అని వార్న్ పేర్కొన్నాడు.
"స్వదేశంలో అశ్విన్‌కు అద్భుతమైన రికార్డు ఉంది. అందుకే కుంబ్లే రికార్డు సహా టెస్టుల్లో అత్యధిక వికెట్లు తీసిన ముత్తయ్య మురళీధరన్ (800) రికార్డు అధిగమించే అవకాశం ఉంది. అంతేకాకుండా టెస్టుల్లో వెయ్యి వికెట్లను పడగొట్టే సత్తా అశ్విన్‌ సొంతం" అని వివరించాడు.