కొవిడ్ వల్ల క్రికెట్లో కూడా పరిస్థితులు దారుణంగా మారాయనడానికి.. ఐపీఎల్ను నిలిపివేయడమే నిదర్శనమని ఆసీస్ క్రికెట్ దిగ్గజం ఇయాన్ ఛాపెల్ అన్నాడు. ఈ నేపథ్యంలో.. ఈ ఏడాది భారత్లో జరగాల్సిన టీ20 ప్రపంచ కప్ వాయిదా పడటమో, వేదిక మారడమో వంటి పరిణామాలు చోటుచేసుకునే అవకాశముందని అభిప్రాయపడ్డాడు.
గతంలోనూ వివిధ కారణాలతో క్రికెట్ మ్యాచ్లు వాయిదాపడ్డాయని.. ఈ సందర్భంగా ఛాపెల్ గుర్తు చేసుకున్నాడు. వాటిలో కొన్ని వింత కారణాలు ఉండేవని తెలిపాడు. 1970-71లో మెల్బోర్న్ క్రికెట్ గ్రౌండ్లో ఆసీస్-ఇంగ్లాండ్ మధ్య రద్దైన మ్యాచ్ గురించి ఇయాన్ పేర్కొన్నాడు. భారీ వర్షం కారణంగా ఈ మ్యాచ్ ఒక్క బంతి పడకుండానే ఆగిపోయింది.