Ashes 2023 : యాషెస్‌ తొలి టెస్టులో విజయం ఎవరిని వరిస్తుందో అన్న ఉత్కంఠ క్రికెట్‌ అభిమానులను కలవరపెడుతోంది. అంచనాలకు తగ్గట్లే నువ్వానేనా అన్నట్లు సాగుతున్న ఈ టోర్నీలో 281 పరుగుల లక్ష్యాన్ని ఛేదించేందుకు బరిలోకి దిగిన ఆసీస్ జట్టు.. సోమవారం జరిగిన ఆట చివరికి మూడు వికెట్లకు 107 రన్స్ స్కోర్ చ చేసింది. తొలి ఇన్నింగ్స్‌ సెంచరీ హీరో ఉస్మాన్ ఖవాజా మరోసారి పట్టుదలతో మైదానంలోకి దిగి చెలరేగిపోయాడు. అతడికి తోడుగా బోలాండ్‌ క్రీజులో ఉన్నాడు. అంతకుముందు జరిగిన రెండో ఇన్నింగ్స్‌లో ఇంగ్లాండ్ జట్టు.. 273 పరుగులకు ఆలౌటైంది. జో రూట్‌, హ్యారీ బ్రూక్‌ , స్టోక్స్ అత్యధిక పరుగులతో రాణించారు. ఇక ఆసిస్ జట్టుకు చెందిన కమిన్స్‌, లైయన్‌ ఇంగ్లాండ్ జట్టుకు ముచ్చెమటలు పట్టించారు.
Eng Vs Aus Ashes 2023 : ఆసీస్ జట్టు ఛేదనను ఆరంభించిన తీరు చూస్తే.. ఆ జట్టు సులువుగా లక్ష్యాన్ని ఛేదించేలా కనిపించింది. ధాటిగా ఆడిన వార్నర్‌.. తన పార్ట్నర్ ఖవాజాతో కలిసి ఇన్నింగ్స్‌కు శుభారంభాన్నిచ్చాడు. ఈ క్రమంలో అతను ఇంగ్లాండ్ బౌలర్ల ఆత్మవిశ్వాసాన్ని దెబ్బతీశాడు. ఓపెనర్లు తొలి వికెట్‌కు 61 పరుగులు జోడించడం వల్ల నాలుగో రోజును ఆసీస్ గొప్పగా ముగించేలా కనిపించింది. కానీ వార్నర్‌ను ఔట్‌ చేసిన రాబిన్సన్‌కు ఇంగ్లాండ్‌ను పోటీలోకి తెచ్చాడు. ఆ తర్వాత లబుషేన్‌, స్మిత్లను అతి కొద్ది సమయంలోనే వరుసగా పెవిలియన్‌ చేర్చిన బ్రాడ్‌.. ఆసీస్‌ను ఆత్మరక్షణలోకి నెట్టాడు. మరో వికెట్‌ కోసం ఇంగ్లాండ్ గట్టిగానే ప్రయత్నించింది. కానీ నైట్‌వాచ్‌మన్‌ బోలాండ్‌తో కలిసి ఖవాజా పట్టుదల ప్రదర్శించిన తీరు ఆ ప్రయత్నాలను అడ్డుకున్నాడు.