'ఇంట్లోనే ఉండండి.. బయటకొస్తే రనౌట్ అవుతారు'

భారత బౌలర్ అశ్విన్.. తను మన్కడింగ్ చేసిన ఫొటోను పోస్ట్​ చేసి, కరోనా లాక్​డౌన్​పై అవగాహన కల్పించే ప్రయత్నం చేశాడు. ఇంట్లోనే జాగ్రత్తగా ఉండమని ప్రజలకు విజ్ఞప్తి చేశాడు.

ప్రస్తుతం భారతదేశమంతా లాక్​డౌన్​లో ఉంది. రానున్న 21 రోజుల పాటు ఎవరూ బయటకు రాకుడదని, ప్రధాని మోదీ చేసిన సూచనల మేరకు ప్రజలందరూ ఇళ్లకే పరిమితమయ్యారు. దీంతో సెలబ్రిటీలు, సోషల్ మీడియా వేదికగా ఈ వైరస్​ అరికట్టటంపై అవగాహన కల్పిస్తున్నారు. ఈ క్రమంలోనే టీమిండియా బౌలర్ రవిచంద్రన్ అశ్విన్ ఓ క్రేజీ ట్వీట్ చేశాడు. గతేడాది ఐపీఎల్​లో​ తను మన్కడింగ్ చేసిన ఫొటోను పోస్ట్​ చేసి, ఆసక్తికర వ్యాఖ్యను జోడించాడు.

"హహహ, ఇది నాకో ఎవరో పంపించారు. ఈ రనౌట్ జరిగి సరిగ్గా ఏడాది అవుతోంది. దేశం లాక్​డౌన్ ఉన్న సమయంలో పౌరులకు ఇది సరైన సూచన. ఇంట్లోనే ఉండండి.. జాగ్రత్తగా ఉండండి" -రవిచంద్రన్ అశ్విన్ ట్వీట్

గత ఐపీఎల్​లో రాజస్థాన్ రాయల్స్​తో జరిగిన మ్యాచ్​లో పంజాబ్ కెప్టెన్ రవిచంద్రన్ అశ్విన్, ప్రత్యర్థి ఆటగాడు బట్లర్‌ను మన్కడింగ్ పద్ధతిలో రనౌట్ చేసి వార్తల్లో నిలిచాడు. ఐసీసీ నిబంధనల ప్రకారం ఇది సరైన పద్ధతే అయినప్పటికీ.. కొందరు మాత్రం విమర్శలు చేశారు.