అంతర్జాతీయ క్రికెట్లో భారత ఆటగాళ్ల హవా నడుస్తోంది. ఈ దశాబ్దంలో మేటి ఆటగాళ్లుగా టాప్లో నిలిచారు కోహ్లీ, రోహిత్. అయితే తాజాగా క్రికెట్ ఆస్ట్రేలియా ప్రకటించిన ఈ దశాబ్ద మేటి జట్టులో మన సారథులు చోటు దక్కించుకున్నారు. టెస్టు టీమ్కు విరాట్ కోహ్లీని, వన్డే టీమ్కు మహేంద్ర సింగ్ ధోనీని కెప్టెన్గా నియమించింది ఆసీస్ క్రికెట్ బోర్డు.
"ఈ దశాబ్దంలో వన్డేలో మేటి ఆటగాడిగా ధోని నిలిచాడు. 2011 ప్రపంచకప్లో మహీ భారత జట్టును ముందుండి నడిపించాడు. గొప్ప ఫినిషర్గానూ పేరు తెచ్చుకున్నాడు."
-క్రికెట్ ఆస్ట్రేలియా
వన్డే జట్టులో ధోనీతో పాటు రోహిత్, కోహ్లీ చోటు సంపాందించారు. హిట్మ్యాన్తో పాటు దక్షిణాఫ్రికా ఆటగాడు హషీమ్ ఆమ్లాను ఓపెనర్గా ఎంపిక చేసింది ఆస్ట్రేలియా. డివిలియర్స్కు నాలుగో స్థానం కేటాయించింది. రెండు జట్లలోనూ చోటు దక్కించుకున్న ఏకైక భారత ఆటగాడిగా కోహ్లీ నిలిచాడు.
ప్రస్తుతం జట్టుకు దూరంగా ఉన్న ధోనీ కుటుంబంతో సరదాగా గడుపుతున్నాడు. ప్రపంచకప్ సెమీఫైనల్ తర్వాత ఇప్పటివరకు ఏ సిరీస్లోనూ ఆడలేదు మహీ. ఫలితంగా రిటైర్మెంట్ వార్తలపై ఊహాగానాలు వినిపిస్తున్నాయి. కానీ దీనిపై ఇప్పటివరకు మాట్లాడలేదీ ఆటగాడు.