హైదరాబాద్లో జరిగిన తొలి టీ20లో టీమిండియా.. 6 వికెట్ల తేడాతో అద్భుత విజయం సాధించింది. వెస్టిండీస్ నిర్దేశించిన 208 పరుగుల లక్ష్యాన్ని 8 బంతులు మిగిలుండగానే ఛేదించింది. కేఎల్ రాహుల్(62), కోహ్లీ(94) అర్ధ శతకాలు చేసి విజయంలో కీలక పాత్ర పోషించారు.
208 పరుగుల లక్ష్యంతో బరిలోకి దిగింది టీమిండియా. ఓపెనర్లలో రోహిత్ శర్మ 8 పరుగులే చేసి ఔటయ్యాడు. అనంతరం క్రీజులోకి వచ్చిన కోహ్లీతో కలిసిన రాహుల్.. స్కోరు బోర్డును పరుగెత్తించాడు. ఈ క్రమంలోనే వీరిద్దరూ రెండో వికెట్కు 100 పరుగుల భాగస్వామ్యం నెలకొల్పారు.
26 పరుగుల వ్యక్తిగత స్కోరు వద్ద రాహుల్.. టీ20ల్లో 1000 పరుగుల మార్క్ను అందుకున్నాడు. ఈ ఘనత సాధించిన ఏడో భారత బ్యాట్స్మన్గా నిలిచాడు. 62 పరుగుల వ్యక్తిగత స్కోరు వద్ద పెవిలియన్ చేరాడు.
టీ20ల్లో 1000 పరుగుల మార్క్ను అందుకున్న
ఆ తర్వాత మిగతా లాంఛనాన్ని కోహ్లీ పూర్తి చేశాడు. 18.4 ఓవర్లలో లక్ష్యాన్ని పూర్తి చేయడంలో కీలక పాత్ర పోషించాడు. విండీస్ బౌలర్లలో కారీ పియర్రే 2, కాట్రెల్, పొలార్డ్ తలో వికెట్ తీయగలిగారు.
అంతకు ముందు టాస్ ఓడి బ్యాటింగ్కు దిగింది వెస్టిండీస్. ఓపెనర్ సిమన్స్ త్వరగానే ఔటయ్యాడు. మరో ఎండ్లో ఉన్న లూయిస్ చెలరేగాడు. 17 బంతుల్లో 40 పరుగులు చేసి వెనుదిరిగాడు. హెట్మయిర్ అర్ధసెంచరీతో ఆకట్టుకున్నాడు.
బ్యాటింగ్ చేస్తున్న విండీస్ క్రికెటర్లు
చివర్లో వచ్చిన హోల్డర్ 9 బంతుల్లో 24 పరుగులు చేసి జట్టు స్కోరు 200 దాటేందుకు సహాయపడ్డాడు. మిగతా వారిలో కింగ్ 31, పొలార్డ్ 37 పరుగులు చేశారు.
భారత బౌలర్లలో చాహల్ 2 వికెట్లు తీయగా, సుందర్, చాహర్, జడేజా తలో వికెట్ దక్కించుకున్నారు.
