బెంగళూరులోని చిన్నస్వామి స్టేడియం వేదికగా భారత్Xదక్షిణాఫ్రికా మధ్య నేడు ఆఖరి టీ20 జరగనుంది. ఇప్పటికే మూడు మ్యాచ్ల సిరీస్లో 1-0 ఆధిక్యంలో ఉన్న కోహ్లీసేన... ఈ మ్యాచ్లోనూ అదరగొట్టాలని భావిస్తోంది. కొత్త ముఖాలతో టీమిండియాకు పోటీనివ్వలేక చతికిలపడిన సఫారీ జట్టు.... చివరి మ్యాచ్లో గెలిచి పరువు నిలుపుకోవాలని పట్టుదలతో ఉంది. మ్యాచ్ రాత్రి 7గంటలకు ప్రారంభం కానుంది.
ఇప్పటివరకు సఫారీలతో స్వదేశంలో జరిగిన టీ20 సిరీస్ల్లో కప్పు గెలవలేదు భారత జట్టు. ఇప్పుడు తొలిసారి ఆ ఘనత సాధించేందుకు అవకాశం వచ్చింది. మరి ఈ పోరుకు సిద్ధమవుతున్న ఇరుజట్ల గురించి ఓసారి చూద్దాం.
విరాట్‌ దూకుడు...
రెండో టీ20లో విరాట్‌ కోహ్లీ (72*) తనదైన ఫామ్తో చెలరేగాడు. టీమిండియా 7 వికెట్ల తేడాతో ఘన విజయం సాధించడంలో కీలకపాత్ర పోషించాడు. ఓపెనర్ శిఖర్ ధావన్‌ ఫామ్‌లోకి వచ్చి సఫారీ బౌలర్లను ఆడుకున్నాడు. గత మ్యాచ్లో తక్కువ పరుగులే చేసిన రోహిత్‌ ఈ సారి విజృంభించి ఆడాలని పట్టుదలతో ఉన్నాడు.
- యువ బ్యాట్స్మెన్ రిషభ్ పంత్ ఈ మ్యాచ్లో నిరూపించుకోవాల్సి ఉంది. చెత్త షాట్లు ఆడి ఔటవడం వల్ల అతడి ఎంపికపై భిన్నాభిప్రాయాలు వ్యక్తం అవుతున్నాయి. కొందరు తీవ్రంగా విమర్శిస్తున్నా.. అతడి ప్రతిభ, విధ్వంసం సృష్టించగల సామర్థ్యాలను చూసి కాస్త ఓపిక పట్టాలని గంగూలీ వంటి మాజీలు సూచిస్తున్నారు.
- పొట్టి ప్రపంచకప్‌కు ఏడాది సమయమే ఉండటం వల్ల మిడిలార్డర్‌లో శ్రేయస్‌ అయ్యర్‌ను పరీక్షిస్తోంది టీమిండియా. అతడు నిలకడ ప్రదర్శన చేశాడు. హార్దిక్‌, జడేజా ఆల్రౌండర్ ప్రదర్శనతో మంచి జోష్ మీద ఉన్నారు.
- యువ బౌలర్లు దీపక్ చాహర్‌, వాషింగ్టన్ సుందర్‌ ఆకట్టుకుంటున్నారు. నవదీప్‌ సైని వేగంగా, తెలివిగా బంతులు వేస్తున్నాడు. వాషింగ్టన్ సుందర్‌ కొత్తబంతితో మంచి స్పిన్ రాబడుతున్నాడు.
డికాక్ అదుర్స్...
క్వింటన్ డికాక్ సారథ్యంలో ప్రొటీస్ జట్టు భారత్తో అమితుమీ తేల్చుకోనుంది. బ్యాటింగ్లో డికాక్, తెంబా బవుమా గత మ్యాచ్లో అద్భుతంగా ఆడారు. వీళ్లిద్దరూ భారత బౌలర్లను బాగానే ఎదుర్కొన్నారు. సీనియర్లు డేవిడ్‌ మిల్లర్‌, రెజా హెండ్రిక్స్‌, డసెన్ బ్యాటింగ్ భారం మోయాల్సి ఉంది.
- బలమైన బౌలింగ్ లైనప్గా పేరున్న దక్షిణాఫ్రికా జట్టు గత మ్యాచ్లో ఆకట్టుకోలేకపోయింది. ముఖ్యంగా టీమిండియాపై మంచి పట్టున్న రబాడా.. పెద్దగా ప్రభావం చూపలేకపోయాడు.
- ఫెలుక్వాయో, నోర్త్జే నిలకడైన ప్రదర్శన చేస్తే భారత్కు కష్టమే. గత మ్యాచ్లో స్పిన్నర్లను ఆలస్యంగా ఉపయోగించిన డికాక్.. బౌలర్లను సరిగ్గా ఉపయోగించుకోవడంలో విఫలమయ్యాడు.