దక్షిణాఫ్రికాతో టీ20 సిరీస్ కోసం భారత జట్టులో స్థానం లభించకపోవడంపై స్పందించాడు టీమిండియా స్పిన్నర్ కుల్దీప్ యాదవ్. తనకు బాధగా లేదని, టెస్టుల్లో మరింత రాటుదేలేందుకు ఈ సమయం ఉపయోగపడుతుందని అన్నాడు.
"పరిమిత ఓవర్ల క్రికెట్లో మంచి ప్రదర్శన చేశా. వన్డే, టీ20లు ఆడటంలో ఎలాంటి ఇబ్బంది లేదు. టీ20 సిరీస్లో చోటు దక్కకపోవడంపై బాధగా లేదు. బహుశా సెలక్టర్లు నాకు విశ్రాంతి కావాలని భావించారేమో. లేదా కొన్ని మార్పులు చేయాలని అనుకుని ఉండొచ్చు. టెస్టుల్లో మరింతగా రాణించడానికి ఈ సమయం ఉపయోగపడుతుందని భావిస్తున్నా" -కుల్దీప్ యాదవ్, టీమిండియా స్పిన్నర్
ప్రపంచకప్ తర్వాత వెస్టిండీస్తో జరిగిన టీ20 సిరీస్కు కుల్దీప్ను ఎంపిక చేయలేదు సెలక్టర్లు. స్వదేశంలో దక్షిణాఫ్రికాతో జరుగుతున్న టీ20లకూ ఈ ఆటగాడికి అవకాశం లభించలేదు.
"కొన్ని మ్యాచ్ల్లో పరుగులు కట్టడి చేయడానికి బదులు ఎక్కువగా ఇవ్వొచ్చు. అప్పుడు కచ్చితత్వంపై దృష్టి పెట్టాలి. పరుగులను నియంత్రించేందుకు ప్రయత్నించాలి." -కుల్దీప్ యాదవ్, టీమిండియా స్పిన్నర్
2016 టీ20 ప్రపంచకప్ తర్వాత 68 టీ20లు ఆడిన కుల్దీప్.. 81 వికెట్లు తీశాడు. ప్రస్తుతం పరిమిత ఓవర్ల క్రికెట్లో మణికట్టు స్పిన్నర్లకు మంచి గిరాకీ ఉందని చెప్పాడు.
"పరిమిత ఓవర్ల క్రికెట్లో స్థిరమైన ప్రదర్శన చేస్తున్న ఆటగాళ్లు అదే స్థాయిలో టెస్టుల్లో రాణించడానికి కాస్త సమయం పడుతుంది. టెస్టుల్లో ఎక్కువ ఓవర్లు వేయాల్సి ఉంటుంది. వికెట్లు తీయడానికి ఫీల్డ్ ప్లేస్మెంట్లపై దృష్టి పెట్టాల్సి ఉంటుంది." -కుల్దీప్ యాదవ్, టీమిండియా స్పిన్నర్
దక్షిణాఫ్రికాతో వచ్చే నెల 2న ప్రారంభమయ్యే టెస్టు జట్టులో చోటు సంపాదించాడు కుల్దీప్.
