టీమ్ఇండియా యువ క్రికెటర్ రిషబ్ పంత్.. తనకు వచ్చిన అవకాశాలను అందిపుచ్చుకోవడంలో విఫలమయ్యాడని మాజీ ఆటగాడు ఆకాశ్ చోప్రా విమర్శించాడు. తుదిజట్టులో స్థానం కోల్పోవడానికి ప్రధాన కారణం అతడి ఆటతీరేనని అభిప్రాయపడ్డాడు. ఆస్ట్రేలియాతో సిరీస్లో అవకాశం దక్కకపోవడంపై.. ఆత్మవిమర్శ చేసుకోవాలని పంత్కు సూచించాడు.
"5,6,7 స్థానాల్లో హార్దిక్ పాండ్య, రిషబ్ పంత్, రవీంద్ర జడేజా బ్యాటింగ్ చేస్తే ఎలా ఉంటుందో ఆలోచించండి. వావ్.. అద్భుతమైన టీమ్ కదా? కానీ, పంత్.. ఇక చాలని సరిపెట్టుకున్నట్లు కనిపిస్తుంది. తనకు వచ్చిన అవకాశాలను సద్వినియోగం చేసుకోలేకపోతున్నాడు. ఈ విషయంలో అతడు ఆత్మవిమర్శ చేసుకోవాలి. అవకాశాలను అందిపుచ్చుకోని కారణంగా తనపై తాను కఠినంగా వ్యవహరించుకోవాలి"