Asia cup 2022: ఇండియా X పాకిస్థాన్‌ మ్యాచ్ అంటే క్రికెట్ అభిమానులకు ఎప్పుడూ పండగే. ఈ రెండు జట్లు ఎప్పుడు తలపడతాయా అని ఆసక్తిగా ఎదురుచూస్తుంటారు. ప్రపంచకప్‌, ఛాంపియన్స్‌ ట్రోఫీ వంటి మెగా ఈవెంట్లలోనే క్రికెట్ ప్రేమికులకు ఈ ముచ్చట తీరుతుంది. అయితే, ఈ సారి ఆసియా కప్‌ పుణ్యమా అని 15 రోజుల వ్యవధిలో భారత్, పాక్ మూడు సార్లు పోటీపడే అవకాశం ఉంది. ఈ నెల 27 నుంచి యూఏఈ వేదికగా ఆసియా కప్‌ ప్రారంభం కానుంది. భారత్ డిఫెడింగ్‌ ఛాంపియన్‌గా బరిలోకి దిగుతుండగా, గత ఏడాది భారత్‌ను టీ20 ప్రపంచకప్‌లో ఓడించామన్న ఉత్పాహంతో పాక్ ఆసియా కప్‌కు సిద్ధం అవుతోంది.
3 సార్లు ఎలా అంటే..!
ఈ ఏడాది ఆసియా కప్‌లో మొత్తం ఆరు జట్లు పోటీపడతాయి. ఈ జట్లను రెండు గ్రూపులుగా విభజించారు. గ్రూపు ఏ లో భారత్, పాక్‌లతోపాటు మరో క్వాలిఫయర్‌ జట్టు ఉంటుంది. ఈ గ్రూపులో అర్హత సాధించేందుకు యూఏఈ, సింగపూర్, హాంకాంగ్, కువైట్ క్వాలిఫయింగ్‌ మ్యాచులు ఆడుతాయి. ఈ నెల 28న దుబాయ్‌ వేదికగా పాక్‌తో, ఆ తర్వాత 31న క్వాలిఫయర్‌ జట్టుతో టీమ్‌ఇండియా తలపడుతుంది. ఈ రెండు మ్యాచ్‌ల్లో ఒకటి నెగ్గినా భారత్ సూపర్ 4కు అర్హత సాధిస్తుంది. గ్రూప్‌లో తొలి రెండు స్థానాల్లో నిలిచే జట్లు సెప్టెంబర్‌ 4న సూపర్ 4లో తలపడతాయి. గ్రూప్‌ ఏలో భారత్, పాక్‌లు కొత్తజట్టుపై గెలవడం దాదాపు ఖాయం. దీంతో ఈ రెండు జట్లే సూపర్ 4లో మరోసారి ఆడే అవకాశం ఉంది.