న‌టీన‌టులు: విజయ్ దేవరకొండ, రష్మిక మందణ్న, రావు ర‌మేశ్ త‌దిత‌రులు
సంగీతం: జస్టిన్ ప్రభాకరన్
సంస్థ: మైత్రీ మూవీ మేక‌ర్స్‌, బిగ్ బెన్ సినిమాస్‌
కథ, స్క్రీన్‌ప్లే, దర్శక‌త్వం: భరత్ కమ్మ
అనతి కాలంలోనే ఊహించని అభిమాన గణం సంపాదించుకున్న యువ హీరో విజయ్ దేవరకొండ. పెళ్లి చూపులు, అర్జున్ రెడ్డి, గీతగోవిందం, టాక్సీవాలా చిత్రాలతో వరుస విజయాలందుకొని ప్రేక్షకులతో 'రౌడీ' అని ముద్దుగా పిలిపించుకున్నాడు. "డియర్ కామ్రేడ్" గా ప్రేక్షకుల్ని శుక్రవారం పలకరించాడు. తెలుగు, తమిళ, మలయాళ, కన్నడ భాషల్లో విడుదలైన ఈ సినిమాకు తానే సమస్తమై ప్రచారాన్ని హోరెత్తించాడు. మరి విజయ్ హిట్టు కొట్టాడా లేదా అనేది తెలియాలంటే చిత్ర సమీక్షలోకి వెళ్లాల్సిందే.
ఇంతకీ 'కామ్రేడ్' కథేంటి?
బాబీ అలియాస్ చైతన్య (విజయ దేవరకొండ) కాకినాడ డిగ్రీ కళాశాలలో చదువుతుంటాడు. వామపక్ష భావజాలం నేపథ్యమున్న కుటుంబంలో పుట్టడం, తాత కామ్రేడ్ సూర్యం స్ఫూర్తితో స్టూడెంట్ లీడర్గా విద్యార్థులు ఎదుర్కొంటున్న సమస్యలపై పోరాటం చేస్తుంటాడు. అప్పుడు లిల్లీ అలియాస్ అపర్ణదేవి(రష్మిక మందణ్న) పరిచయమవుతుంది. క్రికెట్లో ఆమె రాష్ట్రస్థాయి క్రీడాకారిణి. జాతీయ జట్టుకు ఆడాలనేది తన కల. ఈ సమయంలో లిల్లీ, బాబీ ప్రేమలో పడతారు. కానీ అతడి ఆవేశం, గొడవలు లిల్లీకి నచ్చవు. అప్పటికే తన అన్నయ్యను కోల్పోయిన లిల్లీ.. బాబీని ఎక్కడ దూరం చేసుకుంటానో అని మదన పడుతుంటుంది. ఈ క్రమంలో వారిద్దరూ విడిపోతారు. డ్రిపెషన్లోకి వెళ్లిపోతుంది లిల్లీ. మూడేళ్ల తర్వాత ఆమెను కలుసుకున్న కథానాయకుడు అందుకు కారణాలు తెలుసుకుంటాడు. ఆ తర్వాత లిల్లీకి జరిగిన అన్యాయాన్ని ఎలా ఎదిరించాడనేది "డియర్ కామ్రేడ్" కథ.
ఎలా ఉందంటే...?
భావోద్వేగాలతో కూడుకున్న చిన్న అంశం. కానీ సుమారు మూడు గంటలపాటు సాగదీయడం వల్ల ప్రేక్షకుల కొంత ఇబ్బందికి గురవుతారు. ప్రథమార్థం కాలేజ్ గొడవలు, హీరో హీరోయిన్ మధ్య ప్రేమాయణంతో సాగిపోతుంది. ద్వితీయార్థం కొంచెం ఫర్వాలేదనిపిస్తుంది. కథకు కీలకమైన విషయాన్ని పతాక సన్నివేశాలకు అరగంట ముందు చెప్పే సమయానికి... అసలు విషయం ప్రేక్షకులకు అర్థమవుతుంది.
ఎవరెలా నటించారు...?
విజయ్ దేవరకొండ, రష్మికలే ప్రధాన బలం. వీరిద్దరు మరోసారి ప్రేక్షకుల్ని అలరించే ప్రయత్నం చేశారు. విద్యార్థి నాయకుడు, ప్రేమికుడిగా విజయ్ దేవరకొండ తనలోని నటుడ్ని మరోసారి తెరపై ఆవిష్కరించాడు. ప్రేమ కథకు క్రికెట్, వామపక్ష భావాలను జోడించిన దర్శకుడు భరత్ కమ్మ.. సక్సెస్ అయ్యాడనే చెప్పాలి.