'సిక్సర్లు మాత్రమే తెలుసు... మీరు తెలియదు మేడం'

బాలీవుడ్​  అందాల భామ ఆలియా భట్​ ఎవరో తనకు తెలియదని ట్వీటాడు దక్షిణాఫ్రికా స్టార్​ క్రికెటర్​ హర్షలే గిబ్స్​. దీనిపై ఆ నటి స్పందించగా తనదైన రీతిలో సమాధానమిచ్చాడు మాజీ క్రికెటర్​. ప్రస్తుతం వీరిద్దరి మధ్య సంభాషణ నెట్టింట వైరల్​గా మారింది.

బాలీవుడ్​ సొట్ట బుగ్గల సుందరి ఆలియా భట్‌ ఎవరో తెలియదని చెప్పాడు దక్షిణాఫ్రికా మాజీ క్రికెటర్​ హర్షలే గిబ్స్​. అయితే ఆమె నవ్వుతూ ప్రేమగా పలకరిస్తున్న 'జిఫ్ చిత్రం' మాత్రం చాలా బాగుందని ప్రశంసించాడు.

ఆదివారం ఉదయాన్నే తన ట్విట్టర్​లో...." ఉదయాన్నే.. పక్షులు కిలకిలమంటూ పలకరిస్తున్నాయి. నేను కూడా అదే చేస్తాను" అని ట్వీట్​ చేశాడు గిబ్స్. ఈ సందేశానికి అధికారిక ట్విట్టర్​ విభాగం లైక్​ కొట్టింది. ఈ సంఘటనపై సంతోషాన్ని వ్యక్తం చేసిన గిబ్స్​... " ట్విట్టర్​ నీ ట్వీట్​ను లైక్​ చేసినప్పుడు కలిగే ఫీలింగ్​" అని ఆలియా భట్​ నవ్వుతున్న జిఫ్​ ఎమోజీని పోస్టు చేశాడు. దీనిని చాలా మంది రీట్వీట్‌ చేశారు.

ఒక నెటిజన్​ మాత్రం 'ఆమె ఎవరో తెలుసా?' అని ప్రశ్నించాడు. దానికి బదులిచ్చిన గిబ్స్​..."ఆమె ఎవరో తెలియదు. కానీ జిఫ్‌ బాగుంది" అని బదులిచ్చాడు.

ఆలియా స్పందన​...

గిబ్స్​ సమాధానం తర్వాత కొందరు ఆలియా ఎవరో, ఏం చేస్తుందో అతడికి వివరించారు. ఫలితంగా ఆలియాను ట్యాగ్‌ చేసి... "మీరు నటి అని తెలియదు. కానీ జిఫ్‌ ఎమోజీ చాలా బాగుంది" అని ట్వీట్‌ చేశాడీ సఫారీ ప్లేయర్​. అనూహ్యంగా ఆలియా ఆ మాటలకు స్పందించింది. బౌండరీ సిగ్నల్‌ జిఫ్‌ను జత చేసింది. అప్పుడు గిబ్స్‌ "నేను సిక్సర్లతోనే డీల్‌ చేస్తాను మేడమ్‌ ఫోర్లతో కాదు" అని బదులిచ్చాడు. ఇంటర్నెట్‌లో వీరిద్దరి సంభాషణ వైరల్‌గా మారింది.

గిబ్స్‌ సఫారీ జట్టు తరఫున 90 టెస్టులు, 248 వన్డేలు, 23 టీ20లు ఆడాడు. సుదీర్ఘ ఫార్మాట్‌లో 6167, వన్డేల్లో 8094 పరుగులు చేశాడు.