Kalavathi Song challenge: సూపర్‌స్టార్‌ మహేశ్‌బాబు ఫుల్ హ్యాపీగా ఉన్నారు. ఆయన హీరోగా నటించిన 'సర్కారు వారి పాట' నుంచి ఇటీవల విడుదలైన 'కళావతి' పాట అందరినీ ఆకట్టుకుంటోంది. ముఖ్యంగా పాటలో మహేశ్ వేసిన స్టెప్పులకు ప్రేక్షకులు ఫిదా అయ్యారు. ఇప్పుడు ఆ స్టెప్పులనే మహేశ్ కుమార్తె సితార రీక్రియేట్‌ చేసింది.
తన తండ్రిలాగే ఆ సాంగ్కు స్టెప్పులేసి, ఆ వీడియోను ఇన్‌స్టాలో పోస్ట్‌ చేసింది. నెటిజన్లూ ఆ స్టెప్పులు వేయాలంటూ 'కళావతి ఛాలెంజ్' విసిరింది. ప్రస్తుతం ఆ వీడియో వైరల్‌గా మారింది. ఆ వీడియోను మహేశ్‌బాబు తన ఇన్‌స్టా స్టోరీలో పోస్ట్‌ చేస్తూ కుమార్తెపై ప్రశంసలు కురిపించారు. 'మై స్టార్.. నువ్వు నాకన్నా బాగా చేశావు'అని మెచ్చుకున్నారు. ఈ సినిమా మే 12న థియేటర్లలోకి రానుంది.
sebastian movie postponed: 'భీమ్లా నాయక్' సినిమాకు లైన్ క్లియర్ అవుతోంది. ఫిబ్రవరి 25న ఈ చిత్రం సోలోగా రిలీజ్ కానుంది. ఆ తేదీని రిజర్వ్ చేసుకున్న ఇతర సినిమాలు రిలీజ్ డేట్స్ మార్చుకుంటున్నాయి. 'ఆడవాళ్లు మీకు జోహార్లు' ఇప్పటికే వాయిదా పడగా, ఇప్పుడు 'సెబాస్టియన్' కూడా అదే రూట్లో వెళ్లింది. ఈ రెండు చిత్రాలు మార్చి 4న థియేటర్లలోకి రానున్నాయి.