ఇద్దరు ముద్దుగుమ్మలతో 'ఖిలాడి' రవితేజ

'క్రాక్'లో నటిస్తున్న హీరో రవితేజ కొత్త సినిమాకు 'ఖిలాడి' పేరు పెట్టారు. ఇందులో ఇద్దరు ముద్దుగుమ్మలు నటించనున్నారు. త్వరలో షూటింగ్ ప్రారంభం కానుంది.

మాస్ మహారాజా రవితేజ కొత్త సినిమాకు 'ఖిలాడి' టైటిల్ పెట్టారు. ఫస్ట్​లుక్​ను ఆదివారం విడుదల చేశారు. ఇందులో స్టైలిష్​గా కనిపిస్తూ ఆకట్టుకుంటున్నారు రవితేజ. ఇతడి సరసర మీనాక్షి చౌదరి, డింపుల్ హయాతి హీరోయిన్లుగా నటించనున్నారు. నేడు హైదరాబాద్​లో లాంఛనంగా మొదలుకానుందీ చిత్రం.

రవితేజతో ఇంతకు ముందు 'వీర' తీసిన రమేశ్ వర్మ.. ఈ సినిమాకు దర్శకత్వం వహిస్తున్నారు. దేవి శ్రీ ప్రసాద్ సంగీత దర్శకుడు. క్రైమ్ థ్రిల్లర్​ కథతో దీనిని తెరకెక్కిస్తున్నారు. ఇందులో రవి ద్విపాత్రాభినయం చేయనున్నారని సమాచారం. హవీష్ ప్రొడక్షన్స్ పతాకంపై సత్యనారాయణ కొనేరు నిర్మిస్తున్నారు.

'ఖిలాడి' సినిమాలో రవితేజ

ఇప్పటికే 'క్రాక్'లో నటిస్తూ బిజీగా ఉన్నారు రవితేజ. శ్రుతిహాసన్ హీరోయిన్, గోపీచంద్ మలినేని దర్శకత్వం వహిస్తున్నారు. హైదరాబాద్​లో షూటింగ్ జరుగుతోంది.