"ఎప్పుడూ ఒకే తరహా పాత్రలు చేస్తూ పోతే కొన్నాళ్లకు మనపై తెలియని ఓ ముద్ర పడిపోతుంది. అందుకే నటుడిగా అన్ని రకాల పాత్రలు, జోనర్లు చేయాలనుకుంటున్నా. ఎలాంటి పాత్రకైనా సరిపోతాను అనే నమ్మకం రచయితల్లో కలిగించడమే లక్ష్యం" అని అంటున్నాడు హీరో కార్తికేయ. తొలి ప్రయత్నం 'ఆర్‌ఎక్స్‌ 100'తో సంచలన విజయాన్ని సొంతం చేసుకున్న కథానాయకుడు ఇతడు. '90.ఎం.ఎల్'తో శుక్రవారం.. ప్రేక్షకుల ముందుకొచ్చాడు. ఈ నేపథ్యంలో శనివారం హైదరాబాద్‌లో విలేకర్లతో ముచ్చటించాడు. ఆ విశేషాలివే.
'90.ఎం.ఎల్' ఫలితం మీకెలాంటి కిక్‌ ఇచ్చింది?
ఈ చిత్రానికి ప్రేక్షకుల నుంచి వస్తున్న స్పందన చూస్తుంటే చాలా సంతోషంగా ఉంది. థియేటర్లో సినిమా చూస్తున్న ప్రతి ఒక్కరూ వినోదాన్ని ఎంతో చక్కగా ఆస్వాదిస్తున్నారు. ముఖ్యంగా మాస్‌ ప్రేక్షకుల నుంచి మంచి ఆదరణ లభిస్తోంది.
ఈ సినిమాతో మాస్‌ హీరోగా గుర్తింపు దక్కినట్లే అనుకుంటున్నారా?
మాస్‌హీరో అనిపించుకోవాలని ఈ సినిమా చేయలేదు. అన్ని జోనర్లలోనూ నటించాలనుకుంటున్నా. అందులో భాగంగానే ఈ చిత్రం చేశా. చిన్నప్పుడు చిరంజీవిని మాస్‌ పాత్రల్లో చూస్తున్నప్పుడు ఎంతో ఆనందించే వాడిని. ఆయనలా నన్ను నేను ఎలాంటి పాత్రల్లో చూసుకోవాలి అనుకున్నానో అలాంటి పాత్రల్లో ఇదొకటి. తెరపై చూసుకుంటున్నప్పుడు చాలా ఎంజాయ్‌ చేశా.
ఇది సరికొత్త కథాంశంతో తెరకెక్కిన చిత్రం కదా. తొలిసారి విన్నప్పుడు మీకెలా అనిపించింది?
ఓ చిన్న లోపం వల్ల హీరో.. చిన్నప్పటి నుంచి ఆల్కహాల్‌ తీసుకోవడం అన్నది దర్శకుడు చెప్పినప్పుడు చాలా ఆసక్తికి గురి చేసింది. నిజంగా ఇలాంటి వారు ఉంటారా అనుకున్నా. అంతర్జాలంలోనూ దీని గురించి వెతికా. కానీ దొరకలేదు. కేవలం ఇదొక ఫిక్షనల్‌ కథలాంటిది. ప్రేక్షకుల తెరపై చూస్తున్నప్పుడు సర్‌ప్రైజింగ్‌గా ఫీలవుతారనుకొని చేసిన ప్రయత్నమిది.
టైటిల్ వల్ల కుటుంబ ప్రేక్షకులకు ఈ సినిమా దూరం అవుతుందని అనిపించలేదా?
కథకు తగ్గట్లుగా '90.ఎం.ఎల్' అని పేరు పెడితేనే బాగుంటుందనిపించింది. టైటిల్లో కొత్తదనం ఉంది కాబట్టి సినిమాపై ఆసక్తి ఏర్పడుతుందని అలా పెట్టాం. మరో విషయం.. దీనిని మాస్‌ ప్రేక్షకుల్ని దృష్టిలో పెట్టుకునే, వాణిజ్యాంశాలతో నిండిన వినోదాత్మక చిత్రంగా రూపొందించాం. అనుకున్నట్లుగానే ఇది వాళ్లకు చేరింది.
ఈ సినిమాలో మీ డ్యాన్స్‌లు, కామెడీ టైమింగ్‌కు మంచి మార్కులు పడ్డాయి? ఈ విషయాల్లో ఏమైనా ప్రత్యేక కసరత్తులు చేశారా?
ప్రత్యేకంగా అంటూ ఏం చేయలేదు. చిన్నప్పటి నుంచి డ్యాన్స్‌ అంటే చాలా ఇష్టం. చిరంజీవి సినిమాల్లోని పాటలకు స్కూల్, కాలేజీల్లో వేదికలపై డ్యాన్స్‌ చేసేవాడిని. అయితే నా తొలి మూడు చిత్రాల్లో నృత్యాలకు అంత ప్రాధాన్యత దొరకలేదు. '90 ఎం.ఎల్'లో దొరికింది. అందుకే నా పూర్తి ప్రతిభను చూపించా. వినోదం విషయానికొస్తే.. హీరోలు ఎప్పుడు కామెడీ చేసినా ప్రేక్షకులకు నచ్చుతుంది. రజనీకాంత్, చిరు, మహేశ్ వంటి కథానాయకులు నవ్విస్తుంటే చాలా సంతోషంగా ఉంటుంది. అది దృష్టిలో పెట్టుకునే వినోదాత్మక సన్నివేశాల్ని పండించా.
విమర్శల్ని ఎలా స్వీకరిస్తారు? ఈ సినిమా విషయంలో ఏమైనా అలాంటివి మీ దృష్టికి వచ్చాయా?
విమర్శల్ని ఎప్పుడూ గౌరవిస్తా. అందరి అభిప్రాయాలు వింటా. చేసిన తప్పుల నుంచి కొత్త విషయాలు నేర్చుకుంటా. ఆ పొరబాట్లు మళ్లీ జరగకుండా జాగ్రత్త పడుతుంటా. అన్ని సార్లు 'ఆర్‌ఎక్స్‌ 100' లాంటి చిత్రాలు రావు కదా. అది అనుకోకుండా దక్కిన వరం. '90.ఎం.ఎల్' విషయంలో రివ్యూల పరంగా మిశ్రమ స్పందన లభించినప్పటికీ, నా నటనా పరంగా మంచి మార్కులు పడ్డాయి. స్క్రీన్‌ ప్లేలో కొన్ని లోపాలున్నట్లు నా దృష్టికొచ్చాయి. నా తర్వాతి చిత్రానికి ఈ పొరబాటు జరగకుండా జాగ్రత్త పడతా.
'గ్యాంగ్‌లీడర్‌'లో విలన్గా చేశారు. మళ్లీ అలాంటి అవకాశమొస్తే చేస్తారా?
కచ్చితంగా చేస్తాను. నటన అంటే నాకు ఇష్టం. నటుడిగా ఏ పాత్ర చేయడానికైనా సిద్ధమే. కానీ, విలన్ పాత్రలు చేస్తున్నప్పుడు దానికొక ప్రాధాన్యత ఉండాలి. సినిమాకు, నాకూ ఆ పాత్ర ఉపయోగపడేలా ఉండాలి. ఏదో హీరోతో నాలుగు ఫైట్లు చేసేసి వెళ్లిపోయేటట్లు ఉండకూడదు. మనసుకు నచ్చాలే కానీ ఐటెం గీతాలకైనా రెడీనే (నవ్వుతూ).
ప్రస్తుతం ఏ సినిమాలు చేస్తున్నారు?
ఇద్దరు కొత్త దర్శకులతో చేయబోతున్నా. ఒకటి యాక్షన్‌ థ్రిల్లర్‌.. మరొకటి భావోద్వేగాలతో నిండిన ఓ సరికొత్త ప్రేమకథ. త్వరలోనే ఓ చిత్రం పట్టాలెక్కుతుంది. ఈ చిత్రాలకు సంబంధించిన మరిన్ని వివరాలు త్వరలో అధికారికంగా ప్రకటిస్తా.
'దిశ' హత్యాచార ఘటన తర్వాత సామాజిక మాధ్యమాల్లో మీ 'గుణ 369' క్లైమాక్స్‌ సన్నివేశాలు వైరల్‌ అయ్యాయి. దానిపై మీ అభిప్రాయం?
నిజానికి ఆ సన్నివేశాల్ని ప్రజలు అలా స్టేటస్లు పెట్టుకోవడం చూసి నేను కాస్త బాధ పడ్డా. ఆ సినిమాలో ఓ నటుడిగా హత్యాచార నిందితులను శిక్షించానే తప్ప, నిజ జీవితంలో దిశ ఘటనపై ట్వీట్‌ చేయడం తప్ప ఏం చేయగలుగుతున్నానా అనిపించింది.
