ఒక్క పాట కోసం ముగ్గురు కామ్రేడ్స్

డియర్ కామ్రేడ్​ సినిమాలోని 'కామ్రేడ్ ఆంథమ్​​​'ను మూడు భాషల్లో ముగ్గురు హీరోలు పాడారు. తెలుగులో విజయ్ దేవరకొండ, తమిళంలో విజయ్ సేతుపతి, మలయాళంలో దుల్కర్ సల్మాన్ గాత్రమందించారు. ఈనెల 26న ప్రేక్షకుల ముందుకు రానుందీ చిత్రం.

విజయ్‌ దేవరకొండ నటించిన తాజా చిత్రం ‘డియర్‌ కామ్రేడ్’. తెలుగుతోపాటు తమిళం, మలయాళం, కన్నడ భాషల్లోనూ విడుదలకు సిద్ధమవుతోంది. సినిమాను భారీ స్థాయిలో ప్రచారం చేస్తున్నాడీ రౌడీ హీరో. ఇటీవలే ఆయా భాషల్లోని అగ్రహీరోలతో ట్రైలర్ రిలీజ్​​ చేయించాడు. ఇప్పుడు వారితో పాటనూ పాడించేశాడు. విజయ్ సేతుపతి, దుల్కర్ సల్మాన్, విజయ్ దేవరకొండ వేర్వేరుగా పాడిన 'కామ్రేడ్ ఆంథమ్​'ను ప్రేక్షకుల ముందుకు తీసుకొచ్చింది చిత్రబృందం.

'మౌనమిక చాలుపదా' అంటూ సాగే ఈ గీతానికి చైతన్య ప్రసాద్ సాహిత్యం సమకూర్చాడు. జస్టిన్‌ ప్రభాకరన్‌ సంగీతమందించాడు. రష్మిక మందణ్న కథానాయికగా నటించింది. మైత్రీ మూవీ మేకర్స్‌ నిర్మాతగా వ్యవహరించింది. ఈ చిత్రంతో భరత్‌ కమ్మ దర్శకుడిగా పరిచయమవుతున్నాడు. ఈ నెల 26 నుంచి థియేటర్లలో సందడి చేయనుంది 'డియర్ కామ్రేడ్'.

ఇది చదవండి: 'కడలల్లే వేచె కనులే... కదిలేను నదిలా కలలే..'. అంటున్న విజయ్ దేవరకొండ