బాలీవుడ్ మెగాస్టార్ అమితాబ్ బచ్చన్ శనివారం కరోనా బారిన పడ్డారు. ఈ విషయాన్ని ఆయనే స్వయంగా ట్విట్టర్ ద్వారా అభిమానులకు తెలియజేశారు. ఈ క్రమంలోనే తాను నానావతి ఆసుపత్రిలో చికిత్స పొందుతున్నట్లు బిగ్బీ పేర్కొన్నారు. అయితే, ఆసుపత్రిలోని సౌకర్యాలు, పరిస్థితుల గురించి బిగ్బీ వివరిస్తున్న వీడియో.. ప్రస్తుతం సామాజిక మాధ్యమాల్లో వైరల్గా మారింది. ఇందులో కష్ట సమయాల్లో ప్రాణాలను కూడా లెక్కచేయకుండా పనిచేస్తున్న ఆసుపత్రి సిబ్బంది, వైద్యులు, నర్సులకు కృతజ్ఞతలు తెలిపారు అమితాబ్.
"నానావతి ఆసుపత్రిలోని వైద్యులు, నర్సులు, సిబ్బంది అందరితో మాట్లాడాలనుకుంటున్నా. ఇటువంటి క్లిష్టతరమైన పరిస్థితుల్లో మీరు చేస్తున్న సేవ అద్భుతమైనది. త్వరలోనే ఈ పరిస్థితుల నుంచి బయటపడతామనే నమ్మకం నాకుంది. నేను ఎప్పుడు నానావతి ఆసుపత్రికి వచ్చినా సిబ్బంది ఎంతో జాగ్రత్తగా చూసుకుంటారు. వారికి నా హృదయపూర్వక కృతజ్ఞతలు."