ఆన్లైన్ లావాదేవీలకు డిమాండ్ పెరుగుతున్న కొద్దీ.. సైబర్ నేరగాళ్ల భయం కూడా పెరుగుతూ వస్తోంది. ఆన్లైన్ లావాదేవీలకు సెక్యూరిటీ సంస్థలు భద్రతను పటిష్ఠం చేసే దిశగా చర్యలు చేపడుతున్నా.. హ్యాకర్లు కొత్త కొత్త మాల్వేర్లతో వినియోగదారులపై దాడికి ప్రయత్నిస్తున్నారు. ఏమాత్రం అప్రమత్తంగా లేకపోయినా ఖాతాలు ఖాళీ చేసేస్తున్నారు. హ్యాకర్లు ఉపయోగించే ప్రమాదకర మాల్వేర్లలో 'జోకర్' ఒకటి. ఇప్పుడు ఈ వైరస్ మరోసారి వెలుగులోకి వచ్చింది.
బెల్జియం పోలీసుల హెచ్చరికలు..
గతేడాది కలకలం సృష్టించిన 'జోకర్' మాల్వేర్.. మరోసారి వెలుగులోకి వచ్చినట్లు బెల్జియన్ పోలీసులు వెల్లడించారు. ఆండ్రాయిడ్ యూజర్లే లక్ష్యంగా సైబర్ నేరగాళ్లు ప్రయోగించే ఈ జోకర్.. గూగుల్ ప్లే స్టోర్లోని ఎనిమిది యాప్లలో గుర్తించినట్లు తెలిపారు. ఈ వైరస్ కనుక ఫోన్లోకి చొరబడితే వినియోగదారుడి ప్రమేయం లేకుండా, వారికి ఎలాంటి అలర్ట్స్ లేకుండానే వారి బ్యాంకు ఖాతాలు ఖాళీ అవుతాయని హెచ్చరించారు.
అసలు ఏంటీ వైరస్?
'జోకర్'.. 2017లో వెలుగులోకి వచ్చిన ఈ వైరస్.. యాప్ యూజర్లను వణికించింది. వివిధ రకాల అప్లికేషన్ల ద్వారా వినియోగదారుల ఫోన్లలోకి చొరబడి వారి బ్యాంకు ఖాతాలు ఖాళీ అయ్యేలా చేసింది. ఆ సమయంలో అప్రమత్తం అయిన గూగుల్ ప్లే స్టోర్.. యూజర్లు ఇంకా డౌన్లోడ్ చేసుకోని సూమారు 1700 యాప్స్ను తొలగించింది.
2020 సెప్టెంబరులో మరోసారి జోకర్ వచ్చింది. 24 ఆండ్రాయిడ్ యాప్స్లో ఈ వైరస్ను గుర్తించి వాటిని తొలగించారు. కానీ అప్పటికే ఈ యాప్స్కు 5 లక్షల మంది యూజర్లు ఉన్నారు. ఆ సమయంలో ఈ వైరస్ ప్రభావం యూఎస్, బ్రెజిల్, స్పెయిన్ సహా మరో 27 దేశాలపై ఉన్నట్లు అంచనా. హ్యాకర్లు.. బాధితులకు అనుమానం రాకుండా ఉండేందుకు భారీ మొత్తంలో కాకుండా.. వారానికి కొంత మొత్తంలో డబ్బును లూటీ చేస్తున్నట్లు తెలుస్తోంది.
ఈ జోకర్ ఎలా పనిచేస్తుంది?
బ్రెడ్ అనే మాల్వేర్కు చెందిన ట్రోజన్ వైరసే ఈ జోకర్. వినియోగదారులకు అనుమానం రాకుండా వారి ఫోన్లలోకి చొరబడి లావాదేవీలను తన అదుపులోకి తెచ్చుకోవడమే దీని లక్ష్యం.
యాప్ ద్వారా ఫోన్లోకి ప్రవేశించే ఈ జోకర్.. క్రమంగా టెక్స్ట్ మెసేజెస్, కాన్టాక్ట్స్ సహా ఇతర అప్లికేషన్లకు పాకుతుందని 'క్విక్ హీల్' సైబర్ సెక్యురిటీ పరిశోధకులు వెల్లడించారు. ఆందోళనకర విషయం ఏంటంటే.. ఈ వైరస్ ఫోన్లోకి ప్రవేశిస్తే బాధితుడికి ఎలాంటి సమాచారం తెలియకుండానే అతని బ్యాంక్ అకౌంట్ సహా ఇతర ప్రీమియం సర్వీసులను ప్రభావితం చేస్తుంది.
రూటు మారింది..
హ్యాకర్లు మొదట ఎస్ఎంఎస్ ద్వారా ఈ వైరస్ను బాధితుల ఫోన్లకు పంపించేవారు. కానీ ఆ తర్వాత ఆన్లైన్ పేమెంట్స్పైన దృష్టి సారించడం మొదలు పెట్టారు. ఈ రెండు విధానాల్లో వినియోగదారుడు గుర్తించే వీలు లేకుండా లావాదేవీలు జరిపేందుకు అవకాశం ఉంది. టెలిఫోన్ ఆపరేటర్లను విక్రేతలతో అనుసంధానం చేయడం ద్వారా బాధితుడు గుర్తించకుండానే హ్యాకర్లు లావాదేవీలు జరుపుతారు.
భారీ మొత్తంలో కాకుండా కొంత మొత్తంలోనే లూటీ చేస్తుండటం వల్ల బ్యాంకులకు కూడా ఎలాంటి అనుమానం రావడం లేదనే వాదన వినిపిస్తోంది.
ఈ యాప్స్తో డేంజర్..
జోకర్ వైరస్ ఉన్నట్లు గుర్తించి గూగుల్ ప్లేస్టోర్ తొలగించిన యాప్స్ జాబితా ఇదే..
- ఆక్సిలరీ మెసేజ్
- ఎలిమెంట్ స్కానర్
- ఫాస్ట్ మ్యాజిక్ ఎస్ఎంఎస్
- ఫ్రీ క్యామ్ స్కానర్
- గో మెసేజెస్
- సూపర్ మెసేజ్
- సూపర్ ఎస్ఎంఎస్
- ట్రావెల్ వాల్పేపర్స్
అయితే.. సైబర్ సెక్యూరిటీ సంస్థ జెడ్స్కేలర్.. వీటిల్లో కూడా జోకర్ వైరస్ ఉందని పేర్కొంటూ మరో 16 యాప్స్ పేర్లను ప్రకటించింది.
- ప్రైవేట్ ఎస్ఎంఎస్
- హమ్మింగ్ బర్డ్ పీడీఎఫ్ కన్వర్టర్- ఫొటో టు పీడీఎఫ్
- స్తైల్ ఫొటో ఎడిటర్- బ్లర్ ఫోకస్
- పేపర్ డాక్ స్కానర్
- ఆల్ గుడ్ పీడీఎఫ్ స్కానర్
- కేర్ మెసేజ్
- పార్ట్ మెసేజ్
- బ్లూ స్కానర్
- డైరక్ట్ మెసేంజర్
- వన్ సెంటెన్స్ ట్రాన్స్లేటర్- మల్టీఫంక్షనల్ ట్రాన్స్లేటర్
- మింట్ లీఫ్ మెసేజ్- యువర్ ప్రైవేట్ మెసేజ్
- యూనిక్ కీ బోర్డ్- ఫాన్సీ ఫాన్ట్స్ అండ్ ఫ్రీ ఎమోటికాన్స్
- టాన్గ్రామ్ యాప్ లాక్
- డిజైర్ ట్రాన్స్లేట్
- మెటిక్యులస్ స్కానర్
ఈ ప్రమాదకర యాప్స్ ఏవైనా మీ ఫోన్లో ఉన్నాయా?.. ఉంటే వెంటనే తొలగించండి. గూగుల్ ప్లేస్టోర్ తొలగించింది కదా.. ఇవి మన ఫోన్పై ప్రభావం చూపవు అనుకుంటే పొరపాటే. యాప్ను తొలగించే వరకు వైరస్ ప్రభావం మీ డివైజ్పై తప్పకుండా ఉంటుంది. కాబట్టి ఈ 'జోకర్'తో జర జాగ్రత్త.
ఇవీ చూడండి :
