నోరూరించే కశ్మీరీ దమ్​ ఆలూ.. మీరూ ట్రై చేయండి

బంగాళాదుంపతో రుచికరమైన వంటలు ఎన్నో చేయవచ్చు. పిల్లలు కూడా ఎంతో ఇష్టంగా తింటారు. మీ ఇంట్లో రుచికరమైన ఈ కశ్మీరీ దమ్​ ఆలూను ఓసారి ట్రై చేయండి.

బంగాళాదుంపతో ఏది చేసినా రుచికరంగానే ఉంటుంది. ఇతర కూరగాయలతోనూ వీటిని జత చేసి వండుకుంటాం. బంగాళాదుంపతో ఇప్పటికి ఎన్నో రకాల వంటలు చేసి ఉంటారు. మరి కశ్మీరీ దమ్​ ఆలూను ట్రై చేశారా? ఇదిగో ఈ రెసిపీ మీకోసమే...

కావలసినవి:-

• బేబీ పొటాటో- అరకిలో
• పెరుగు- 8 టేబుల్​ స్పూన్లు
• ఉల్లిపాయలు- రెండు
• పుదీనా ఆకులు- సరిపడా
• నూనే- 6 టేబుల్​ స్పూన్లు
• శొంఠిపొటి- 2 టేబుల్​ స్పూన్లు
• జాజికాయ పొడి- చిటికెడు
• గరం మసాలా- చిటికెడు
• తాజామీగడ- 2 టేబుల్​ స్పూన్లు
• ఉప్పు- రుచికి సరిపడా
• అల్లంవెల్లులి- 3 టేబుల్​ స్పూన్లు
• కశ్మీరీ కారం- 4 టేబుల్​ స్పూన్లు
• కొత్తిమీర తురుము 3 టేబుల్​ స్పూన్లు

తయారీ..

బంగాళాదుంపల్ని ఉడికించి తొక్క తీయాలి. ఫోర్క్​తో బంగాళాదుంపలకు గాట్లు పెట్టి కాగిన నూనెలో బంగారు వర్ణంలోకి మారే వరకూ వేయించి తీయాలి. ఇప్పుడు ఓ బాణాలిలోకి కచ్చాపచ్చగా రుబ్బిన ఉల్లిముక్కలు, పెరుగు, అల్లంవెల్లుల్లి ముద్ద, కశ్మీరీ కారం, గరం మాసాలా, శొంఠిపొడి, జాజికాయ పొడి వేసి బాగా కలపాలి.

అందులోనే వేయించిన బంగాళాదుంపలు, కొత్తిమీర తురుము, పుదీనా ఆకులు, ఉప్పు వేసి స్టవ్​ మీద పెట్టి సిమ్​లో సుమారు అరగంటసేపు ఉడికించి దించాలి. అంతే.. కశ్మీరీ దమ్​ ఆలూ రెడీ.

ఇదీ చూడండి:-రెస్టారెంట్ స్టైల్ శాండ్​విచ్ ఇంట్లోనే చేయండిలా...