నందీతా మన్‌చన్‌దా యూఎస్‌లో గ్రాడ్యుయేషన్‌ చేసింది. అక్కడ చదువుతున్నపుడు తన స్నేహితురాలికి చర్మ క్యాన్సర్‌ అని తేలింది. ఆ అమ్మాయికి అప్పటికి 21 ఏళ్లే. ఆమెను థెరపీలు, చికిత్సకు నందీతానే తీసుకెళ్లేది. డెర్మటాలజిస్ట్‌ ఆమె ఉపయోగించిన సౌందర్య ఉత్పత్తులోని రసాయనం క్యాన్సర్‌కి కారణమైందని చెప్పారు. ఆమె మనసు సౌందర్యోత్పత్తుల్లోని కెమికల్స్‌పైనే ఆగిపోయింది.
ఆలోచన ఇలా..
2010లో ఆమె భారత్‌కు తిరిగొచ్చినా... ఈ ఆలోచన మాత్రం అలాగే ఉండిపోయింది. పెళ్లైన తర్వాత బ్యూటీ సెలూన్‌నూ సొంతంగా ఏర్పాటు చేసుకుంది. కస్టమర్ల కోసం వాడే ఉత్పత్తుల్లో రసాయనాలుండేవి. కొంతమంది రసాయనాలు లేకుండా ఉంటే బాగుండనే అనుకునేవారు. అదేదో తనే చేస్తే బాగుంటుందేమో అనిపించింది. దాని ఫలితమే ‘ఎన్స్‌ క్లోజెట్‌’. ఇది సాకారం కావడానికి కొన్నేళ్ల సమయం పట్టింది. కస్టమర్ల అవసరాలు, అభిప్రాయాలను తెలుసుకోవడంతో పాటు తన అనుభవాలనూ జోడించి పరిశోధన జరిపింది. వాటన్నింటినీ దృష్టిలో పెట్టుకుని సహజసిద్ధ పదార్థాలతో 2018లో ఈ బ్రాండ్‌ను ప్రారంభించింది. దీనిలో రసాయనాలు, జంతువుల అవశేషాలు వంటివి లేకుండా చూసుకుంది.
‘నా ఆలోచనలు సంస్థ దిశగా సాగడంలో మా బామ్మదే ప్రధాన పాత్ర. చిన్నప్పటి నుంచి ఆహార పదార్థాలను సౌందర్య పోషణలో ఉపయోగించడం ఆమె నుంచే నేర్చుకున్నాను. పెరుగు, కాఫీ, పండ్లు, గోధుమ పిండి.. ఇలా ప్రతిదాన్నీ ముఖానికీ, జుట్టుకీ పట్టించేవాళ్లం. అదే ఈ ప్రొడక్ట్స్‌ రూపొందించడానికీ సాయపడింది. కొందరు సరకులు ఇచ్చే వాళ్లూ మొదట ఒకటి చూపించి, తర్వాత నాసిరకం పంపేవాళ్లు. నావద్ద తక్కువకు తీసుకుని ఎక్కువ రేట్లకు అమ్మే వాళ్లు. వీటన్నింటి నుంచి నెమ్మదిగా పాఠాలు నేర్చుకున్నాను. అందం ఒకొక్కరిలో ఒక్కోలా ఉంటుంది. రంగుకి కాకుండా ఆరోగ్యానికి ప్రాధాన్యమివ్వమవ్వాలి.’