ప్రార్థనా మందిరంలో పేలుళ్లు అఫ్గానిస్థాన్లో పర్షియన్ నూతన సంవత్సరాది 'నౌరోజ్' వేడుకలు విషాదంగా మారాయి. కాబూల్లోని షైతే ప్రార్థనా స్థలంలో వరుస బాంబు పేలుళ్లకు పాల్పడ్డారు ఉగ్రవాదులు. ఘటనలో ఐదుగురు పౌరులు మృత్యువాత పడ్డారు. 20 మందికిపైగా గాయపడ్డారు. రిమోట్ సాయంతో మూడు బాంబులను వెనువెంటనే పేల్చినట్టు పోలీసుల దర్యాప్తులో తేలింది.
కాబూల్లోని కార్తి సఖి ప్రార్థనా మందిరం పరిసర ప్రాంతాల్లో షైతే ప్రజలు అధికంగా నివసిస్తారు. ఏటా నౌరోజ్ పర్వదినాన సంప్రదాయంగా వేడుకలు జరుపుకుంటారు. ఆకుపచ్చ రంగు జెండాలను ఎగురవేసి, పూర్వీకులను స్మరించుకుంటారు. ఈ పర్షియన్ పండగను మధ్యప్రాచ్యంలో ఘనంగా చేసుకుంటారు.
వేడుకల్లో ఉగ్రవాదుల కదలికలపై ఇప్పటికే ప్రజలను అఫ్గాన్ ప్రభుత్వం హెచ్చరించింది. ఇప్పటివరకూ ఘటనపై ఏ ఉగ్రసంస్థ స్పందించలేదు. అయితే ఇస్లామిక్ స్టేట్ అనుబంధ సంస్థలు షైతే ముస్లింలే లక్ష్యంగా వరుస దాడులకు పాల్పడుతున్నారు. సున్నీ మిలిటెంట్ సంస్థలు షైతే ముస్లింలను మతవిరోధులుగా భావించటమే ఇందుకు కారణం.
ఇదీ చూడండి:అకిరే పర్వతంపై కుర్దుల నౌరోజ్ వేడుకలు అదిరే..
