Biden Xi Meeting :అమెరికాతో తాము సత్సంబంధాలనే కోరుకుంటున్నామని అగ్రరాజ్య అధ్యక్షుడు జో బైడెన్‌తో.. చైనా అధ్యక్షుడు జిన్పింగ్ అన్నారు. శాన్‌ఫ్రాన్సిస్కోలో జరుగుతున్న ఆసియా -పసిఫిక్‌ ఆర్థిక సహకార సదస్సుకు హాజరైన జిన్పింగ్.. అనంతరం కాలిఫోర్నియాలో బైడెన్‌తో నాలుగు గంటలపాటు.. సుదీర్ఘంగా చర్చలు జరిపారు. ద్వైపాక్షిక సంబంధాలు, వాణిజ్యం, తైవాన్ అంశాలతో పాటు.. రెండు దేశాల మధ్య కొనసాగుతున్న వివాదాలపై చర్చించారు. వాతావరణ మార్పులు, మాదక ద్రవ్యాల రవాణాను ఎదుర్కోవడం, మానవ హక్కుల ఉల్లంఘనలు, దక్షిణ చైనా సముద్రంలో అలజడులపై కూడా బైడెన్-జిన్పింగ్ చర్చలు జరిపారు. ఈ సమావేశం తర్వాత అమెరికా-చైనా మధ్య సైనిక సంబంధాలు పునరుద్ధరణకు ఇరువురు నేతలు అంగీకారం తెలిపారు. ఒకరినొకరు గౌరవించుకుంటూ.. శాంతిని స్థాపిస్తూ.. విజయం సాధించేందుకు పరస్పర సహకారం అందించుకుంటూ ముందుకు సాగుదామని బైడెన్‌కు.. జిన్పింగ్ సూచించారు. విభేదాలకు అతీతంగా ఎదగాలని.. రెండు ప్రధాన దేశాలు ఒకదానితో ఒకటి కలిసి అభివృద్ధికి సరైన మార్గాన్ని కనుగొనాలని జిన్పింగ్ విజ్ఞప్తి చేశారు. ఈ విజ్ఞప్తికి బైడెన్ సానుకూలంగా స్పందించారు.
తైవాన్పై మా వైఖరి అదే! : అమెరికా
బైడెన్-జిన్పింగ్ మధ్య తైవాన్ అంశంపైనే సుదీర్ఘంగా చర్చ జరిగింది. తైవాన్‌ను ఆక్రమించే దిశగా సాగుతున్నట్లు వచ్చిన వార్తలను జిన్పింగ్ ముందు బైడెన్ ప్రస్తావించారు. తైవాన్‌లో శాంతి, సుస్థిరతను కాపాడేందుకు అమెరికా కట్టుబడి ఉందని బైడెన్ మరోసారి స్పష్టం చేశారు. తైవాన్ విషయంలో అమెరికా యథాతథ స్థితిని అవలంబిస్తుందని బైడెన్ చెప్పారు. అమెరికా-చైనా సంబంధాలలో తైవాన్ అంశమే.. ప్రమాదకరమైనదని జిన్పింగ్ వ్యాఖ్యానించారు. శాంతి మార్గం మంచిదేనని.. కానీ ఏదో ఒక సమయంలో సమస్య పరిష్కారం వైపు వెళ్లాల్సిందేనని.. స్పష్టం చేశారు.
తైవాన్పై మేము దండయాత్ర చేయడం లేదు : చైనా
అయితే తైవాన్ విషయంలో చైనా చివరకు పునరేకీకరణను సాధిస్తుందని బైడెన్‌కు.. జిన్పింగ్ స్పష్టం చేసినట్లుగా చైనా అధికారిక పత్రిక జిన్హువా వెల్లడించింది. జనవరిలో తైవాన్‌లో జరగబోయే ఎన్నికల ప్రక్రియను గౌరవించాలని.. జిన్‌పింగ్‌ను బైడెన్ కోరారు. తైవాన్ చుట్టూ సైన్యాన్ని మోహరిస్తున్నా ఎలాంటి దండయాత్రకు సిద్ధం కావడం లేదని.. డ్రాగన్‌ స్పష్టం చేసింది. ఉక్రెయిన్‌- రష్యా యుద్ధంపై కూడా ఇరువురు నేతలు చర్చలు జరిపారు. కృత్రిమ మేధస్సుపై కలిసి పనిచేయాలని.. అమెరికా-చైనా ఒప్పందం చేసుకున్నాయి.