బ్రిటన్​లో కరోనా టీకా పంపిణీకి సర్వం సిద్ధం

టీకా పంపిణీకి బ్రిటన్ సిద్ధమైంది. ఫైజర్​ వ్యాక్సిన్ అత్యవసర వినియోగానికి ఆమోద ముద్ర వేసిన నేపథ్యంలో.. టీకా తొలి డోసులను దిగుమతి చేసుకుంది. ఎంపిక చేసిన 50 ప్రభుత్వ ఆస్పత్రులలో మంగళవారం టీకా పంపిణీ మొదలు కానుంది.

బ్రిటన్​కు చెందిన 50 జాతీయ వైద్య సేవ(ఎన్​హెచ్​ఎస్) ఆస్పత్రులు కరోనా వ్యాక్సిన్ పంపిణీకి సిద్ధమయ్యాయి. ఫైజర్ టీకా అత్యవసర వినియోగానికి ఆమోదముద్ర వేసిన బోరిస్ జాన్సన్ ప్రభుత్వం ఈ మేరకు ఏర్పాట్లు చేస్తోంది. బెల్జియం నుంచి ఫైజర్ వ్యాక్సిన్ తొలి డోసులు బ్రిటన్​కు చేరుకున్నాయని అక్కడి ప్రభుత్వం వెల్లడించింది. సురక్షితమైన ప్రదేశాల్లో వీటిని నిల్వ చేసినట్లు తెలిపింది.

కరోనాపై పోరాడుతున్న వైద్య సేవల సిబ్బంది, 80 ఏళ్లకు పైబడిన వృద్ధులు, కేర్​ హోమ్ వర్కర్లకు ముందుగా టీకా ఇవ్వాలని ప్రభుత్వం నిర్ణయించింది. కరోనా టీకా పంపిణీని చరిత్రలో అతిపెద్ద ఇమ్యునైజేషన్ కార్యక్రమంగా అభివర్ణిస్తోంది.

"కరోనా వ్యాక్సిన్ పంపిణీ కార్యక్రమం ప్రారంభిస్తున్న నేపథ్యంలో వచ్చే వారం చారిత్రక ఘట్టం ఆవిష్కృతం కానుంది. వైరస్​ను అణచివేసేందుకు ప్రతి ఒక్కరూ తమ వంతుగా కృషి చేయాలి. ఎన్​హెచ్​ఎస్ ఈ కార్యక్రమాన్ని కొనసాగిస్తున్న సమయంలో ప్రజలంతా స్థానిక నిబంధనలు పాటించాలి."

-మాట్ హాన్​కాక్, బ్రిటన్ వైద్య శాఖ మంత్రి

తొలి విడతలో భాగంగా ఎంపిక చేసిన 50 కేంద్రాలలో టీకా పంపిణీ కార్యక్రమం జరగనుందని వైద్య, సామాజిక సంరక్షక శాఖ(డీహెచ్​ఎస్​సీ) తెలిపింది. మంగళవారం నుంచి టీకాలు అందించనున్నట్లు వెల్లడించింది. క్రమంగా మరిన్ని ఆస్పత్రులలో టీకా సరఫరాకు ఏర్పాట్లు చేయనున్నట్లు స్పష్టం చేసింది.

పలు మీడియా కథనాలను బట్టి బ్రిటన్ రాణి ఎలిజబెత్-2, ఆమె భర్త ప్రిన్స్ ఫిలిప్సైతం వ్యాక్సిన్ స్వీకరించనున్నట్లు తెలుస్తోంది.