కరోనా వైరస్పై పోరాడేందుకు చైనా, అమెరికా ఏకమవ్వాల్సిన అవసరముందని అభిప్రాయపడ్డారు చైనా అధ్యక్షుడు జిన్పింగ్. కరోనాపై పోరుకు సంబంధించి తమ అనుభవాలను, దగ్గరున్న సమాచారాన్ని అగ్రరాజ్యంతో పంచుకుంటామని స్పష్టంచేశారు.
చైనాకన్నా అధికంగా అమెరికాలో కరోనా కేసులు నమోదైన వేళ... ట్రంప్తో ఫోన్లో మాట్లాడారు జిన్పింగ్. "ప్రస్తుతం అమెరికా-చైనా సంబంధాలు సంక్లిష్ట దశలో ఉన్నాయి. ఈ సమయంలో పరస్పర సహకారం ఇద్దరికీ లాభదాయకం. అదే ఇద్దరికీ ఉన్న ఉత్తమ మార్గం. ద్వైపాక్షిక బంధాన్ని మెరుగుపరుచుకునేందుకు అమెరికా సరైన చర్యలు తీసుకుంటుందని , కరోనాపై పోరాడేందుకు ఇరు దేశాలు కలిసి పనిచేస్తాయని ఆశిస్తున్నా" అని అన్నారు చైనా అధ్యక్షుడు.