ఇటీవల అమెరికా పర్యటన ముగించుకొని తిరిగివస్తున్న పాక్ ప్రధాని ఇమ్రాన్ ఖాన్ విమానంలో సాంకేతిక లోపం తలెత్తిన విషయం తెలిసిందే. దీంతో తిరిగి న్యూయార్క్‌లోనే అత్యవసరంగా ల్యాండ్‌ అయ్యారు. అయితే దీనికి అసలు కారణం సాంకేతిక లోపం కాదట! ఇమ్రాన్ ఐక్యరాజ్య సమితి సమావేశాల్లో ప్రదర్శించిన దౌత్య నీతితో సౌదీ యువరాజు మహ్మద్‌ బిన్‌ సల్మాన్‌ అసంతృప్తి వ్యక్తం చేశారట. అందువల్లే తన ఫ్లైట్‌లో అతిథి మర్యాదలు చేసి పంపిన సల్మాన్‌ తిరిగి తన విమానాన్ని తనకు అప్పగించాలని పాక్ బృందాన్ని కోరారట. దీనిపై పాకిస్థాన్‌కు చెందిన ఓ ప్రముఖ వార పత్రిక ‘ఫ్రైడే టైమ్స్‌’ ఓ కథనం ప్రచురించింది.
ఐరాస సమావేశాలకు వెళ్లడానికి ముందు రెండురోజులు పాటు ఇమ్రాన్‌ఖాన్‌ సౌదీలో పర్యటించారు. అయితే అతిథిగా వచ్చిన ఇమ్రాన్‌ను కమర్షియల్ విమానంలో పంపడం ఇష్టంలేక సౌదీ యువరాజు తన ప్రైవేట్‌ జెట్‌ను ఇచ్చారు. దీంతో ఇమ్రాన్‌తో పాటు ఆయన ప్రతినిధి బృందం దాంట్లోనే అమెరికా పర్యటనకు వెళ్లారు. పర్యటన ముగించుకొని వస్తుండగా.. సాంకేతిక లోపం తలెత్తి తిరిగి న్యూయార్క్‌ వెళ్లారు. తర్వాతి రోజు కమర్షియల్ ఫ్లైట్‌లో ఇస్లామాబాద్‌ చేరుకొన్నారు. అయితే తాజా ‘ఫ్రైడే టైమ్స్‌’ కథనం మాత్రం ఈ వాదనతో పూర్తిగా విభేదించింది.