రూ.3,667కోట్లు దాటిన అమెరికా సాయం

కరోనాతో విలవిల్లాడుతున్న భారత్​కు పదిహేను రోజుల వ్యవధిలోనే సుమారు రూ.3,667 కోట్ల సాయం అందించింది అమెరికా. ప్రభుత్వంతో పాటు వివిధ సంస్థలు, కార్పొరేట్ వర్గాలు చేసిన సాయం ఇందులో ఉంది. ఈ నెల చివరి నాటికి సుమారు భారత్​కు అందే సాయం ఒక బిలియన్ డాలర్లు దాటే అవకాశం ఉందని తెలుస్తోంది.

అమెరికా అధ్యక్షుడు జో బైడెన్​, ప్రధానమంత్రి నరేంద్ర మోదీ మధ్య ఫోన్​ సంభాషణ జరిగి పక్షం రోజులు కాకముందే ఆ దేశం నుంచి ఇప్పటికే వేల కోట్ల సహాయం భారత్​కు అందింది. అమెరికా నుంచి సహాయక విమానాలు నిరంతరం కొనసాగుతున్నాయి. ఇప్పటివరకు అర బిలియన్ డాలర్ల(సుమారు రూ.3,667 కోట్లు) విలువైన వైద్య పరికరాలు, ఇతర సామాగ్రిని అమెరికా భారత్​కు అందించింది. బైడెన్ ప్రభుత్వం సాయం చేస్తామన్న 100 మిలియన్ డాలర్లు, ఫార్మా సంస్థ ఫైజర్ నుంచి 70 మిలియన్ డాలర్లు, 4.5 లక్షల ఫైజర్ డోసులు(175 మిలియన్ డాలర్లు) ఇందులో ఉన్నాయి.

గతనెలలో మోదీతో మాట్లాడిన బైడెన్.. భారత్​కు అండగా ఉంటామని హామీ ఇచ్చారు. అమెరికాకు భారత్ సహాయం పంపించిన విధంగానే.. తామూ భారత్​కు సాయం చేసేందుకు కట్టుబడి ఉన్నట్లు చెప్పారు.

ఇదీ చదవండి:భారత్​కు అండగా ఉంటామని పిచాయ్​, నాదెళ్ల హామీ

తన సన్నిహిత భాగస్వామికి అమెరికా ప్రభుత్వం చేస్తున్న సాయం చూసి అక్కడి కార్పొరేట్ వర్గాలు సైతం కదిలొచ్చాయి. గ్లోబల్ టాస్క్​ఫోర్స్​ను ఏర్పాటు చేసి భారత్​కు విరాళాలు అందిస్తున్నాయి. దీని ద్వారా 18 మిలియన్ డాలర్లను అందించనున్నట్లు గూగుల్ ప్రకటించింది. బోయింగ్, మాస్టర్​కార్డ్ తలో 10 మిలియన్ డాలర్ల చొప్పున సహాయాన్ని ప్రకటించాయి.

"ఈ నెల చివరి నాటికి మొత్తం సహాయం విలువ ఒక బిలియన్ డాలర్లు దాటుతుంది. అమెరికాలోని భారత సంతతి ఇక్కడి పరిస్థితులను చూసి చలించిపోతున్నారు. ప్రతిఒక్కరు ఏదో ఓ సందర్భంలో దీని గురించి ఆలోచిస్తున్నారు."

-ముకేశ్ అఘి, 'అమెరికా భారత్ వ్యూహాత్మక భాగస్వామ్య ఫోరం' నిపుణుడు

"గత రెండు వారాల నుంచి అమెరికా వ్యాప్తంగా భారత్​కు గణనీయ మద్దతు లభిస్తోంది. అమెరికా ప్రభుత్వం, వ్యాపార వర్గాలు, ప్రజల నుంచి సహకారం అందుతోంది. ఇది అసాధారణమైనది. ఇరుదేశాల మధ్య ఉన్న లోతైన అనుబంధానికి ఇది నిదర్శనం. గతేడాది కరోనా ఉద్ధృతి కొనసాగినప్పుడు అమెరికాకు భారత్ అండగా నిలబడిన విషయాన్ని అమెరికన్లు గుర్తుంచుకున్నారు. అయితే భారత్​లో ప్రస్తుతం తీవ్రమైన పరిస్థితులు ఉన్న నేపథ్యంలో మరింత సహకారం అందించాల్సిన అవసరం ఉంది."

-నిషా దేశాయ్ బిశ్వాల్, యూఎస్ ఇండియా బిజినెస్ కౌన్సిల్ అధ్యక్షురాలు

గంటల్లోనే మిలియన్ డాలర్లు పోగు

వేలకొద్ది ఆక్సిజన్ కాన్సన్​ట్రేటర్లు, విమానాల నిండా ఔషధాలు, వైద్య పరికరాలు ఇండియాకు వస్తున్నాయి. దాదాపు ప్రతిరోజు ఒక విమానం అమెరికా నుంచి భారత్​కు చేరుకుంటోంది. మైక్రోసాఫ్ట్ సంస్థ అమెరికా ప్రభుత్వంతో కలిసి ఆక్సిజన్ సరఫరా కోసం ప్రయత్నాలు చేస్తోంది. ఫెడెక్స్, యూపీఎస్ సంస్థలు వైద్య పరికరాల రవాణాకు సహకారం అందిస్తున్నాయి. తమిళనాడుకు చెందిన భారతీయ అమెరికన్ ఎంఆర్ రంగస్వామి.. విరాళాల సేకరణ కార్యక్రమం ప్రారంభించారు. 'హెల్ప్ ఫర్ తమిళనాడు బ్రీత్' పేరుతో 1.5 మిలియన్ డాలర్లను గంటల వ్యవధిలో పోగు చేశారు.

ఈ మహమ్మారి నుంచి భారత్ బయటపడాలని ప్రతిదేశం కోరుకుంటోందని యూఎస్ఏ-ఇండియా ఛాంపర్ ఆఫ్ కామర్స్ అధ్యక్షుడు కరుణ్ రిషి తెలిపారు. లేదంటే ఆ ప్రభావం తమపై తప్పక పడుతుందని ఆందోళన చెందుతున్నాయని చెప్పారు. భారత్​కు అందించాల్సిన సహకారం మరింత పెరగాలని అభిప్రాయపడ్డారు.

ఇవీ చదవండి: