ఇరాన్​ దాడికి అమెరికా ప్రతిస్పందన ఎలా ఉంటుందో?

ఇరాన్​ జరిపిన బాలిస్టిక్​ క్షిపణుల దాడిలో అమెరికాకు చెందిన 80మంది సైనికులు మరణించినట్టు ఇరాన్​ వార్తా సంస్థ పేర్కొంది. సులేమానీ మరణానికి ప్రతీకారంగానే ఈ దాడి చేసినట్టు స్పష్టం చేసింది. తమ దేశ సైనికులపై దాడి జరిగినట్టు అమెరికా ధ్రువీకరించినప్పటికీ.. మృతుల సంఖ్యను మాత్రం వెల్లడించలేదు. ఇప్పటికే.. సులేమానీ మరణంతో ఇరాన్​-యూఎస్​ మధ్య ఉద్రిక్త పరిస్థితుల నెలకొన్న నేపథ్యంలో.. శ్వేతసౌధ దళాలపై దాడికి అమెరికా ఎలా ప్రతిస్పందిస్తుందోనని ప్రపంచదేశాలు కలవరపడుతున్నాయి.

ఇరాక్​లోని అమెరికా సైనిక స్థావరాలే లక్ష్యంగా ఇరాన్​ జరిపిన దాడిలో అగ్రరాజ్యానికి భారీ ప్రాణ నష్టం కలిగినట్టు తెలుస్తోంది. డజనుకుపైగా బాలిస్టిక్​ క్షిపణులతో ఇరాక్​లోని అల్​ అసద్​, ఆర్బిల్​ మిలిటరీ స్థావరాలపై దాడి చేసినట్టు ప్రకటించిన ఓ ఇరానీ వార్తా సంస్థ.. ఈ ఘటనలో అమెరికాకు చెందిన 80మందికిపైగా సైనికులు ప్రాణాలు కోల్పోయినట్టు పేర్కొంది. ఈ ఆపరేషన్​కు "మార్టర్​ సులేమానీ" అనే పేరు పెట్టినట్టు తెలిపింది. రివల్యూషనరీ గార్డ్స్​ మేజర్​ జనరల్​​ ఖాసీం సులేమానీ మరణానికి ప్రతీకారంగానే దాడి చేసినట్లు స్పష్టం చేసింది.

22 క్షిపణులతో దాడి!

అమెరికా దళాలపై ఇరాన్ ఎన్ని క్షిపణులతో దాడి చేసిందనే అంశంపై స్పష్టత లేదు. అయితే ఈ ఆపరేషన్​లో ఇరాన్​ 22 మిసైల్స్​ను ఉపయోగించినట్టు ఇరాక్​ మిలిటరీ తెలిపింది. వీటిల్లో 17 అల్​ అసద్, 5 అర్బిల్​ సైనిక స్థావరాలపై పడినట్టు పేర్కొంది. ఈ ఘటనలో ఇరాక్​ బలగాల్లో ఎవరికీ ప్రాణనష్టం జరగలేదని ప్రకటించింది.

అమెరికా సహించేనా...?

దాడి జరిగినట్టు అమెరికా ధ్రువీకరించినప్పటికీ... మృతుల సంఖ్యపై ఎలాంటి ప్రకటన చేయలేదు. ఇరాన్​ మిసైల్స్​ అగ్రరాజ్య బలగాలపై విరుచుకుపడిన అనంతరం.. అమెరికాలోని శ్వేతసౌధంలో అత్యవసర సమావేశం నిర్వహించారు. అధ్యక్షుడు డొనాల్డ్​ ట్రంప్​న​కు పరిస్థితిని వివరించారు.

తమ పౌరులు, సైనికుల ప్రాణాలకు హాని కలిగించే విధంగా ఎవరైనా ప్రవర్తిస్తే అమెరికా నుంచి కఠిన చర్యలు తప్పవని ఇప్పటికే అనేక మార్లు హెచ్చరించారు ట్రంప్​. అయితే తాజా ఘటనకు సంబంధించి త్వరలోనే ఓ కీలక ప్రకటన చేస్తానని ట్వీట్​ చేశారు. ఇరాన్​ దాడిలో 80మందికిపైగా అగ్రరాజ్య సైనికులు మరణించినట్టు వస్తున్న వార్తల నేపథ్యంలో ట్రంప్​ ఎలాంటి నిర్ణయం తీసుకుంటారనే ప్రశ్న చర్చనీయాంశమైంది.

ఇదీ చూడండి: అమెరికా చెంపపై చాచి కొట్టాం: ఇరాన్ అధినేత ఖమేనీ