అపర కుబేరుడు, అమెజాన్ అధినేత జెఫ్ బెజోస్.. హాలీవుడ్‌ అగ్ర హీరో, టైటానిక్ సినిమాతో ప్రపంచవ్యాప్తంగా అభిమానుల్ని సంపాదించుకున్న నటుడు లియోనార్డో డికాప్రియోపై బెదిరింపులకు పాల్పడ్డారు. ఇక్కడకు రా.. చూసుకుందాం అంటూ భయపెట్టాడు. అయితే ఇదంతా సరదాకే. తన ప్రియురాలు, డికాప్రియోకు సంబంధించిన ఓ వీడియో నెట్టింట వైరల్‌గా మారడంతో జెఫ్ బెజోస్ ట్విట్టర్‌ వేదికగా సరదాగా స్పందించారు.
ఇంతకీ విషయం ఏంటంటే.. అమెరికాలోని లాస్‌ఏంజెల్స్‌లో గత శనివారం జరిగిన లాక్మే ఆర్ట్‌ ఫిల్మ్‌ గాలా కార్యక్రమానికి అమెజాన్ అధినేత తన ప్రియురాలు లారెన్‌ సాంచెజ్‌తో కలిసి హాజరయ్యారు. అదే వేడుకకు డికాప్రియో సైతం వచ్చారు. ఈ సందర్భంగా డికాప్రియో, లారెన్‌ సాంచెజ్‌ కొద్దిసేపు సరదాగా సంభాషించుకున్నారు. ఇందుకు సంబంధించి ఆరు సెకన్ల నిడివి గల ఓ వీడియో ట్విట్టర్‌లో తెగ వైరలవుతోంది. కాగా ఈ వీడియోపై జెఫ్ బెజోస్ సరదాగా స్పందించారు. 'ప్రమాదం! ఏటవాలుగా ఉన్న కొండ ప్రాంతం' అని హెచ్చరిక బోర్డును పట్టుకొని చొక్కా లేకుండా తాను దిగిన ఓ ఫొటోను ఆ వీడియోకు జత చేస్తూ.. 'లియో ఇక్కడకు రా.. నీకొకటి చూపించాలి' అంటూ బెజోస్ ఓ ట్వీట్‌ చేశారు. కాగా ఈ ట్వీట్‌ వైరలయ్యింది. ఇప్పటికే దానిని 17 మిలియన్ల మంది వీక్షించారు. 1.4 లక్షల లైకులతోపాటు వేల మంది సరదా కామెంట్లు చేశారు.