సౌదీ డ్రోన్ దాడి వెనకున్నది ఇరానే: అమెరికా సౌదీ అరేబియా చమురు క్షేత్రాలపై జరిగిన దాడి ఇరాన్ భూభాగం నుంచే జరిగిందని అమెరికా తేల్చిచెప్పింది. ఈ దాడిలో క్రూయిజ్ క్షిపణులు వాడినట్లు పేర్కొంది.
"చమురు క్షేత్రాలపై జరిగిన దాడి గురించి అమెరికా మరిన్ని సాక్ష్యాధారాలు సేకరిస్తోంది. వీటిని వచ్చేవారం జరిగే ఐక్యరాజ్యసమితి సర్వసభ్య సమావేశంలో.. అంతర్జాతీయ సమాజానికి, ముఖ్యంగా యూరోపియన్ మిత్రదేశాలకు అందించనుంది"- ఓ అమెరికా అధికారి
సౌదీ పర్యటనకు పాంపియో..
సౌదీ చమురు క్షేత్రాలపై దాడి జరిగిన నేపథ్యంలో... అమెరికా విదేశాంగమంత్రి మైక్ పాంపియో సౌదీలో పర్యటించనున్నారు. అమెరికా ఉపాధ్యక్షుడు మైక్ పెన్స్ ఈ మేరకు ప్రకటించారు. డ్రోన్ దాడి వెనుక ఇరాన్ ఉన్నట్లు అమెరికా భావిస్తోందని ఆయన తెలిపారు. మిత్ర దేశాలను రక్షించుకోవడానికి యుద్ధానికైనా అమెరికా సిద్ధమని ఆయన పేర్కొన్నారు.
"అధ్యక్షుడు ట్రంప్ చెప్పినట్లుగా, మేము ఎవరితోనూ యుద్ధం కోరుకోవడం లేదు. కానీ యుద్ధమే వస్తే అందుకు అమెరికా సిద్ధంగా ఉంది."
- మైక్ పెన్స్, అమెరికా ఉపాధ్యక్షుడు
ఇరాన్ అధ్యక్షుడిని కలిసేది లేదు..
వచ్చేవారం జరిగే ఐరాస సర్వసభ్య సమావేశం సందర్భంగా ఇరాన్ అధ్యక్షుడు హసన్ రౌహానీతో భేటీ కావడం తనకు ఇష్టం లేదని అమెరికా అధ్యక్షుడు డొనాల్డ్ ట్రంప్ స్పష్టం చేశారు.
ట్రంప్ అధికారంలోకి వచ్చిన తరువాత ఇరాన్- అమెరికా అణుఒప్పందం నుంచి యూఎస్ వైదొలిగింది. అనంతరం ఇరాన్పై కఠినమైన ఆంక్షలు విధించింది శ్వేతసౌధం. అప్పటి నుంచి జరుగుతున్న వివిధ పరిణామాలతో ఇరుదేశాల మధ్య ఉద్రిక్తతలు కొనసాగుతూనే ఉన్నాయి.
తప్పు మామీద తోయద్దు...
చమురు క్షేత్రాలపై దాడికి పాల్పడింది తామేనని యెమెన్ హుతీ రెబల్స్ ప్రకటించినప్పటికీ అమెరికా... తమపై తప్పుడు ఆరోపణలు చేస్తోందని ఇరాన్ విదేశాంగమంత్రి మొహమ్మద్ జావెద్ జారిఫ్ పేర్కొన్నారు.
పునరుద్ధరిస్తాం..
సెప్టెంబర్ చివరినాటికి ఆరాంకోలో... చమురు ఉత్పత్తిని పునరుద్ధరిస్తామని సౌదీ అరేబియా ప్రకటించింది.
"మీ కోసం ఓ శుభవార్త. ఈ నెల చివరి నాటికి చమురు ఉత్పత్తి సాధారణ స్థితికి చేరుకుంటుంది. "- ప్రిన్స్ అబ్దులజీజ్ బిన్ సాల్మాన్, ఇంధన మంత్రి
ఇదీ చూడండి:ఈపీఎఫ్ఓ చందాదార్లకు శుభవార్త.. పెరిగిన వడ్డీ రేట్లు
