AR Constable Suicide : తెల్లారితే నిశ్చితార్థం. విధులకు వెళ్లిన కుమారుడు ఉదయాన్నే వస్తానని చెప్పాడు. ఇక బంధువులందరూ ఇల్లు చేరారు. తెల్లారితే తమ కొడుకు నిశ్చితార్థ వేడుకను వైభవంగా జరపాలనకున్నారు. వచ్చిన వారికి ఏ లోటు లేకుండా చూసుకోవాలని తాపత్రయపడ్డారు. కానీ విధికి వారిని చూసి కన్నుకుట్టింది. అప్పటిదాకా సంబురంగా ఉన్న ఆ ఇంట్లో ఒక్కసారిగా ఆర్తనాదాలు ఘొల్లుమన్నాయి. కొడుకు నిశ్చితార్థ వేడుకను వైభవంగా జరపాలనుకున్న ఆ తల్లిదండ్రులు... తమ కుమారుడిని మరణశయ్యపై చూడాల్సి వచ్చింది.
ములుగు జిల్లాకు బదిలీ చేశారని మనస్తాపానికి గురై ఓ కానిస్టేబుల్ బలవన్మరణానికి పాల్పడిన ఘటన ఖమ్మంలో జరిగింది. ఖమ్మం జిల్లా కల్లూరు మండలం యజ్ఞనారాయణపురానికి చెందిన ఏఆర్ కానిస్టేబుల్ కంచపోగు అశోక్ కుమార్... 2020 బ్యాచ్కు చెందిన ఉద్యోగి. ములుగు ప్రాంతంలో కానిస్టేబుల్గా విధులు నిర్వహించేవారు. ఇటీవల కొత్తగూడెం జిల్లాకు బదిలీ అయింది.
బదిలీ అయ్యాక కూడా... ములుగులోనే విధులు నిర్వర్తించాలని ఉన్నతాధికారులు చెప్పడంతో అశోక్ కుమార్ మనస్తాపానికి గురయ్యారని ఆయన తండ్రి చెప్పారు. ఈ నెల 8న ఖమ్మం వచ్చిన అశోక్... నగరంలోని ఓ హోటల్లో రాత్రి బసచేశారు. ఉదయం ఎంతకూ గది తలుపులు తీయకపోవడంతో హోటల్ సిబ్బంది పోలీసులకు సమాచారం ఇచ్చారు. వారు వచ్చి తలుపులు తీసి చూడగా అశోక్ కుమార్ ఫ్యానుకు ఉరి వేసుకొని చనిపోయారని పోలీసులు చెబుతున్నారు. ఈ ఘటనపై పోలీసులు కేసు నమోదు చేసుకొని దర్యాప్తు చేస్తున్నారు.
అశోక్ కుమార్కు సోమవారం నాడు వివాహ నిశ్చితార్థం జరగాల్సి ఉంది. తెల్లారితే ఎంగేజ్మెంట్ అనగా... కొడుకు చనిపోవడంతో ఆయన తల్లిదండ్రులు గుండెలవిసేలా విలపిస్తున్నారు. నిశ్చాతార్థ వేడుక కోసం ఇంటికి వచ్చిన బంధువులు కన్నీరుమున్నీరుగా ఏడ్చారు. ఈ ఘటనతో స్థానికంగా తీవ్ర విషాద ఛాయలు అలుముకున్నాయి.
మా కొడుకు ములుగులో చేస్తున్నాడు. ఈమధ్యే కొత్తగూడెంకు బదిలీ అయ్యాడు. కానీ ఇంకా ఆరు నెలలు ములుగులోనే చేయాలని అధికారులు అన్నారని మాతో చెప్పాడు. అందుకు చాలా బాధపడ్డాడు. ఈ మధ్యే పెళ్లి కూడా కుదిరింది. ఇవాళే ఎంగేజ్మెంట్ జరగాల్సి ఉంది. రాత్రికి హోటల్కు వచ్చినట్లు పోలీసులు చెప్పారు. అయితే ఎందుకు ఆత్మహత్య చేసుకున్నాడో మాకు తెలియడం లేదు. దీనికి కారణాలు ఏంటో తెలుసుకొని మాకు న్యాయం చేయాలి.
-వెంకటేశ్వర్లు, మృతుడి తండ్రి
ఇదీ చదవండి:ఏపీలో తెలంగాణ కుటుంబం ఆత్మహత్య కేసు.. సెల్ఫీ వీడియో బహిర్గతం
