నిమ్మగడ్డ రమేశ్‌ను ఎస్ఈసీగా పునర్నియమిస్తూ హైకోర్టు ఇచ్చిన తీర్పును సవాల్‌ చేసిన నేపథ్యంలో... మధ్యంతరంగా ఎస్ఈసీని నియమించేలా గవర్నర్‌కు ఆదేశాలివ్వాలన్న ఆంధ్రప్రదేశ్ ప్రభుత్వ విజ్ఞప్తిని సుప్రీంకోర్టు తిరస్కరించింది. హైకోర్టు ఇచ్చిన తీర్పులో స్పష్టత లేదని, తద్వారా అధికారులు కూడా విధులు నిర్వహించలేకపోతున్నారని... ప్రభుత్వ న్యాయవాది రాకేశ్‌ ద్వివేది సుప్రీంకోర్టుకు తెలిపారు. మధ్యంతరంగా ఎస్ఈసీని నియమించేలా గవర్నర్‌కు సూచించాలని ధర్మాసనాన్ని విన్నవించారు. ఐతే... గవర్నరకు ఇప్పుడు సూచన చేయలేమన్న సుప్రీంకోర్టు.. రాష్ట్ర ప్రభుత్వ వాదనను తోసిపుచ్చింది. ఎన్నికల నిర్వహణపై తాము మాట్లాడదలచుకోలేదని స్పష్టం చేసింది. రెండు, మూడు వారాల్లో కేసు విచారణ ముగించాలని భావిస్తున్నామని.. 3 వారాల తర్వాత తుది వాదనలు వింటామంటూ వాయిదా వేసింది.
గతంలోనూ మధ్యంతర ఉత్తర్వులకు నిరాకరణ
గతంలోనూ నిమ్మగడ్డ తొలగింపు వ్యవహారంలో సర్వోన్నత న్యాయస్థానంలో రాష్ట్ర ప్రభుత్వానికి చుక్కెదురైంది. సర్కారు ఆర్డినెన్స్‌ను కొట్టేస్తూ హైకోర్టు వెలువరించిన తీర్పుపై స్టే ఇచ్చేందుకు సుప్రీంకోర్టు నిరాకరించింది. ప్రతివాదులందరికీ నోటీసులు జారీ చేస్తూ విచారణను 2 వారాలకు వాయిదా వేసింది. నిమ్మగడ్డ రమేశ్ కుమారే రాష్ట్ర ఎన్నికల కమిషనర్‌ అన్న హైకోర్టు ఉత్తర్వులపై స్టే కోరుతూ రాష్ట్ర ప్రభుత్వం సుప్రీంకోర్టులో అప్పీలు చేసింది. ప్రధాన న్యాయమూర్తి ఎస్‌ఏ బోబ్డే, జస్టిస్‌ ఏఎస్‌ బోపన్న, జస్టిస్‌ హృషికేష్‌రాయ్‌తో కూడిన ధర్మాసనం బుధవారం వీడియో కాన్ఫరెన్స్‌ ద్వారా విచారణ చేపట్టింది.
రాష్ట్ర ప్రభుత్వం తరఫున సీనియర్‌ న్యాయవాదులు ముకుల్‌ రోహత్గీ, రాకేష్‌ ద్వివేదీ సహా మొత్తం ఆరుగురు న్యాయవాదులు హాజరయ్యారు. నిమ్మగడ్డ రమేశ్‌కుమార్‌ తరఫున సీనియర్‌ న్యాయవాదులు హరీశ్‌ సాల్వే, పీఎస్‌ నరసింహ, వర్ల రామయ్య తరపున సీనియర్‌ న్యాయవాదులు ఏకే గంగూలీ, న్యాయవాది గుంటూరు ప్రమోద్‌కుమార్‌, భాజపా నేత కామినేని శ్రీనివాస్‌ తరఫున జంధ్యాల రవిశంకర్‌, ఏపీసీసీ నేత మస్తాన్‌ వలీ తరఫున సీనియర్‌ న్యాయవాది ఆదినారాయణరావు హాజరయ్యారు.
ముందుగా వాదనలు ప్రారంభించిన ముకుల్‌ రోహత్గీ సుప్రీంకోర్టు గతంలో ఇచ్చిన షంషేర్‌సింగ్‌ తీర్పును ఉదహరించారు. ‘రాజ్యాంగంలోని ఆర్టికల్‌ 243కె, 243జడ్‌ఏ ప్రకారం మంత్రిమండలి సహాయం, సలహాను అనుసరించి రాష్ట్ర ఎన్నికల కమిషనర్‌ను నియమించే అధికారం గవర్నర్‌కు ఉంది. కానీ ఎన్నికల కమిషనర్‌ నియామకం పూర్తిగా గవర్నర్‌ వ్యక్తిగత విచక్షణకు లోబడి ఉంటుందని ఈ కేసులో హైకోర్టు తీర్పు చెప్పడం న్యాయబద్ధం కాదు అని వాదించారు. హైకోర్టు తీర్పుపై స్టే ఇవ్వాలని కోరారు. అందుకు ప్రధాన న్యాయమూర్తి జస్టిస్‌ బోబ్డే నిరాకరించారు.