లాక్డౌన్ నిబంధనలు, పర్యాటకంపై ఆంక్షల అమలు... వీధి వ్యాపారులపై తీవ్ర ప్రభావం పడింది. లాక్డౌన్ సడలించినా... క్యాపిటల్ ఇన్వెస్ట్‌మెంట్ లేక, సరైన వ్యాపారం జరగక చిరు, వీధి వ్యాపారులు తీవ్ర ఇబ్బందులు పడుతున్నారు. ఆత్మనిర్భర భారత్ అభియాన్ ద్వారా సూక్ష్మ, చిన్న, మధ్యతరహా పరిశ్రమలకు హామీతో కూడిన రుణాలను మంజూరు చేసిన కేంద్రం... ఇప్పడు వీధి వ్యాపారుల జీవనోపాధికి లబ్ధి చేకూరేలా పీఎం స్ట్రీట్ వెండర్స్ ఆత్మనిర్భర నిధిని అందుబాటులోకి తీసుకువచ్చింది. తద్వారా రోడ్డు పక్కన వ్యాపారం చేస్తూ పొట్ట పోసుకునే వీధి వ్యాపారులకు ఈ స్వనిధి పథకం ద్వారా పదివేల చొప్పున ఆర్థిక సహాయం అందనుంది.
నేరుగా ఖాతాల్లోకే..
ఈ పథకాన్ని మొదటి దశలో 108 నగరాల్లో అమలు చేయనున్నారు. వీధి వ్యాపారుల రుణ దరఖాస్తుల పరిశీలన, లోన్ మొత్తాన్ని వారి ఖాతాల్లోకి సత్వరం జమచేసేందుకు కేంద్రం ప్రత్యేకంగా మొబైల్ యాప్‌ సైతం ప్రారంభించింది. ఇప్పటి వరకు పీఎం స్వనిధికి లక్షన్నర వరకు దరఖాస్తులు వరకు రాగా... 50 వేల వరకు అనుమతులు పొందాయని కేంద్ర పట్టణ, గృహ వ్యవహారాల మంత్రిత్వశాఖ తెలిపింది. ఏడాది గడువు ఉన్న లోన్‌ను సకాలంలో చెల్లించిన వారికి అదనపు లోన్ సౌకర్యం సైతం కల్పిస్తామని కేంద్రం పేర్కొంది.