నూజివీడులో మెగా గ్యాస్ పైప్లైన్ లీక్
ఏపీలోని కృష్ణా జిల్లా నూజివీడులో మెగా గ్యాస్ పైప్లైన్ లీకై మంటలు భారీగా ఎగిసిపడ్డాయి. హనుమాన్ జంక్షన్ రోడ్డులోని సూపర్ మార్కెట్ వద్ద ఉన్న చెత్తకు.. గుర్తు తెలియని వ్యక్తులు నిప్పు పెట్టారు. దీంతో ఒక్కసారిగా పైప్లైన్ లీకై తీవ్రస్థాయిలో మంటలు ఎగిసిపడ్డాయి. భారీగా ఎగిసిపడ్డ మంటలతో పట్టణ ప్రజలు భయభ్రాంతులకు గురయ్యారు. ఈ విషయం తెలుసుకున్న పోలీసులు, అగ్నిమాపక సిబ్బంది సంఘటనా స్థలానికి చేరుకున్నారు.
మెగాగ్యాస్ పైప్లైన్ వారికి సమాచారం అందించడంతో.. గ్యాస్ సరఫరా నిలిపేశారు. అయినప్పటికీ.. మంటలు అదుపులోకి రాలేదు. అగ్నిమాపక సిబ్బంది రంగంలోకి దిగి మంటలను అదుపు చేశారు.