Ganesh Immersion in Telangana: రాష్ట్రవ్యాప్తంగా గణేశ్ శోభాయాత్రతో ఆధ్యాత్మిక వాతావరణం వెల్లివిరుస్తోంది. ఊరువాడా నిమజ్జనోత్సవ సందడి నెలకొంది. ఆదిలాబాద్‌లో గణేశుడి శోభయాత్ర ప్రారంభమైంది. స్థానిక శిశుమందిరంలో హిందూ ఉత్సవ సమితి ఆధ్వర్యంలో జరిగిన ప్రత్యేక సమావేశం అనంతరం వినాయక విగ్రహానికి జిల్లా కలెక్టర్‌ సిక్తాపట్నాయక్‌, ఎమ్మెల్యే జోగు రామన్న సహా భాజపా నేతలు ప్రత్యేక పూజలు నిర్వహించారు. నిమజ్జన కార్యక్రమానికి భక్తులు అధిక సంఖ్యలో పాల్గొంటున్నారు. పెన్‌గంగ నదిలో శనివారం ఉదయం వరకు విగ్రహాల నిమజ్జనం పూర్తయ్యేలా ఏర్పాట్లు చేసినట్లు ఎస్పీ ఉదయ్‌ కుమార్‌ రెడ్డి చెబుతున్నారు. నిర్మల్‌లో దేవదాయ శాఖ మంత్రి అల్లోల ఇంద్రకరణ్ రెడ్డి గణేశ్ నిమజ్జనం శోభాయాత్రను ప్రారంభించారు. బుధవార్‌పేట్ ఒకటో నంబర్ గణపతి వద్ద ప్రత్యేక పూజలు నిర్వహించి శోభాయాత్రలో ఉత్సవ సమితి సభ్యులతో పాటు పట్టణవాసులతో కలిసి నృత్యం చేసి స్థానికులను ఉత్సాహపరిచారు.
నిజామాబాద్‌లో గణేశ్ విగ్రహాల నిమజ్జనం ఉత్సాహంగా సాగుతోంది. ఐదు అడుగుల లోపు విగ్రహాలు నగరంలోనే నిమజ్జనం చేస్తుండగా.. ఆపై విగ్రహాలను బాసర సమీపంలోని నవీపేట మండలం యంచ వద్ద నిమజ్జానికి తరలిస్తున్నారు. శోభాయాత్ర నగరంలోని దుబ్బ నుంచి వినాయకుల బావి వరకు నిర్వహిస్తున్నారు. వరంగల్, ఖాజీపేట, వరంగల్ నగరంలో జోరు వర్షంలోనూ నిమజ్జనం కొనసాగుతోంది. గణేశ్ నిమజ్జనాన్ని వరంగల్ తూర్పు ఎమ్మెల్యే నన్నపునేని నరేందర్ ప్రారంభించారు. చిన్న వడ్డేపల్లి చెరువు వద్ద ప్రత్యేక పూజలు చేసిన అనంతరం వరంగల్ తూర్పు ఎమ్మెల్యే క్యాంప్ కార్యాలయంలో ఏర్పాటు చేసిన గణనాధుని నిమజ్జనం చేశారు. గణేశ్ శోభాయాత్రలతో నగరంలోని వీధులన్నీ కోలాహలంగా మారాయి.