లాక్డౌన్ నేపథ్యంలో కేంద్రం ప్రకటించిన ఉచిత వంట గ్యాస్ పథకం ద్వారా భారీగా ప్రజలు లబ్ధి పొందారు. ప్రధానమంత్రి ఉజ్వల యోజన లబ్ధిదారులు 8 కోట్ల మంది ఉండగా.. ఏప్రిల్- మే నెలల్లో 6.8 కోట్ల సిలిండర్లను ఉచితంగా అందించినట్లు ప్రకటించింది ఇంధన మంత్రిత్వ శాఖ.
"2020 ఏప్రిల్లో ఆయిల్ కంపెనీలు 4.53 కోట్ల సిలిండర్లను ఉజ్వల లబ్ధిదారులకు అందించారు. మే 20 నాటికి ఈ సంఖ్య 6.79 కోట్లకు చేరింది."
- ఇంధన మంత్రిత్వ శాఖ
కరోనా సంక్షోభం నేపథ్యంలో పేదలకు ఉపశమనం కలిగించేలా రూ.1.7 లక్షల కోట్లతో ప్రధానమంత్రి గరీబ్ కల్యాణ్ ప్యాకేజీని మార్చిలో ప్రకటించింది కేంద్రం. ఇందులో ఉజ్వల పథకం లబ్ధిదారులకు ఏప్రిల్ నుంచి జూన్ మధ్య కాలంలో 3 ఎల్పీజీ సిలిండర్లు ఉచితంగా అందిస్తామని స్పష్టం చేసింది.
జూన్ వరకు మొత్తం 24 కోట్ల సిలిండర్లు ఉచితంగా ఇచ్చేందుకు కేంద్రం సిద్ధమైంది. ఇందుకు రూ.13 వేల కోట్లు ఖర్చవుతుంది. అయితే ప్రస్తుత గణాంకాలను పరిశీలిస్తే జూన్ వరకు 14 కోట్లకు మించేలా లేవు.
దేశంలోని గ్రామీణ ప్రాంతాల్లో పేద మహిళలకు వంటగ్యాస్ కనెక్షన్ ఉచితంగా ఇవ్వాలని ఉజ్వల పథకాన్ని 2016లో ప్రారంభించింది మోదీ ప్రభుత్వం. ఈ పథకం కింద ఇప్పటివరకు 8 కోట్ల మంది లబ్ధి పొందారు.