తొలిసారి 42వేల మార్క్​ అందుకున్న సెన్సెక్స్​

దేశీయ స్టాక్​మార్కెట్లు లాభాలతో ప్రారంభమయ్యాయి. అమెరికా-చైనా మొదటి దఫా వాణిజ్య ఒప్పందంపై ట్రంప్ సంతకం చేయడమే ఇందుకు కారణం. సెన్సెక్స్​ 42 వేల మార్కును తొలిసారి అందుకుంది. నిఫ్టీ 12 వేల మార్కు దాటి ట్రేడవుతోంది. అంతర్జాతీయ మార్కెట్లు కూడా లాభాల్లో పరుగులు తీస్తున్నాయి.

అమెరికా-చైనా మొదటి దఫా వాణిజ్య ఒప్పందంపై ట్రంప్ సంతకం చేసిన నేపథ్యంలో దేశీయ స్టాక్​మార్కెట్లకు ఊపొచ్చింది. ఫలితంగా బీఎస్​ఈ సెన్సెక్స్​ తొలిసారిగా 42 వేల మార్కును అందుకుని ట్రేడవుతోంది.

బొంబాయి స్టాక్ ఎక్స్ఛేంజి సూచీ సెన్సెక్స్ 129 పాయింట్లు లాభపడి 42 వేల 2 వద్ద కొనసాగుతోంది. జాతీయ స్టాక్​ ఎక్స్ఛేంజి సూచీ నిఫ్టీ 31 పాయింట్లు వృద్ధిచెంది 12 వేల 374 వద్ద ట్రేడవుతోంది.

లాభనష్టాల్లో..

ఎస్​ బ్యాంకు, నెస్లే, సన్​ఫార్మా, పవర్​గ్రిడ్​ కార్ప్​, హెచ్​యూఎల్​, ఎస్​బీఐ రాణిస్తున్నాయి.

వేదాంత, జేఎస్​డబ్ల్యూ స్టీల్​, ఎన్​టీపీసీ, టాటా స్టీల్​, హీరో మోటోకార్ప్​, ఎమ్​ అండ్ ఎమ్, టాటా మోటార్స్​ నేలచూపులు చూస్తున్నాయి.

అంతర్జాతీయ మార్కెట్లు

యూఎస్​-చైనా వాణిజ్య ఒప్పందం విజయవంతమైన నేపథ్యంలో వాల్​స్ట్రీట్​ను లాభాలు ముంచెత్తాయి. ఆసియా మార్కెట్లలో నిక్కీ, కోస్పీ లాభాల్లో కొనసాగుతుండగా, హాంగ్​సెంగ్​, షాంఘై కాంపోజిట్​ నష్టాల్లో ట్రేడవుతున్నాయి.

రూపాయి విలువ

రూపాయి విలువ 7 పైసలు పెరిగి, ఒక డాలరుకు రూ.70.75గా ఉంది.

ముడిచమురు ధర

అంతర్జాతీయ మార్కెట్​లో ముడిచమురు ధర 0.61 శాతం పెరిగింది. ప్రస్తుతం బ్యారెల్ ధర 64.39 డాలర్లుగా ఉంది.

ఇదీ చూడండి: '50 మీటర్ల దూరంలో పెట్రోల్​ బంకులు ఉండరాదు'