కరోనాపై పోరులో అమెరికా వైద్యులకు అండగా..

అమెరికాలో కరోనాపై పోరాడుతోన్న వైద్యులకు అవసరమయ్యే రక్షణ పరికరాలను అందించడానికి భారత ప్రముఖ ఆటో మొబైల్ దిగ్గజం మహీంద్ర సంస్థ ముందుకొచ్చింది. వీటి తయారీ కోసం తమ డెట్రాయిట్​ ఆటో ప్లాంట్​లో మార్పులు చేస్తున్నట్లు తెలిపింది.

కరోనా వైరస్​ను ఎదుర్కొనేందుకు అమెరికాలోని వైద్యులకు వ్యక్తిగత రక్షణ పరికరాలను అందించడానికి భారత ప్రముఖ ఆటో మొబైల్​ దిగ్గజం మహీంద్ర సంస్థ సిద్ధమైంది. వీటి తయారీ కోసం తమ డెట్రాయిట్​ ఆటో ప్లాంట్​లో మార్పులు చేస్తున్నట్లు పేర్కొంది.

చైనాలో మొదలైన ఈ వైరస్​ ప్రపంచదేశాలకు విస్తరించింది. ప్రపంచ వ్యాప్తంగా మాస్కులు, గౌన్లు, వెంటిలేటర్లు వంటి వైద్య సామగ్రి భారీ సంఖ్యలో అవసరమయ్యాయి. ఈ మహమ్మారిపై పోరాటానికి సాధ్యమైనంత వరకు మిచిగాన్​ రాష్ట్ర అధికారులు, తయారీ సంఘాలు తదితరులతో కలిసి పనిచేస్తున్నట్లు మహీంద్ర సంస్థ పేర్కొంది.

మిచిగాన్​ రాష్ట్రంలోని డెట్రాయిట్​.. అమెరికా ఆటోమెటివ్​ పరిశ్రమకు నిలయంగా మారిన అతిపెద్ద నగరాల్లో ఒకటి. ప్రస్తుతం కరోనా కేసులు అధికమవ్వడం వల్ల ఈ నగరాన్ని హాట్​స్పాట్​ కేంద్రంగా ప్రకటించింది ప్రభుత్వం. ఏప్రిల్​ 14 నాటికి మిచిగాన్​లో సుమారు 25వేల మంది వైరస్ బారిన పడ్డారు. అమెరికాలో మొత్తం 6 లక్షలకుపైగా పాజిటివ్ కేసులు నమోదయ్యాయి.

అత్యాధునిక టెస్టింగ్​ కిట్​ల పంపిణీ..

కరోనా రోగులకు చికిత్స అందించేందుకు ఉపయోగించే అత్యాధునిక​ డయాగ్నొస్టిక్​ టెస్టింగ్​ కిట్​లను భారత వైద్య పరిశోధన మండలి(ఐసీఎంఆర్)కి అందజేసినట్లు హ్యూందాయ్ మోటార్​ సంస్థ గురువారం తెలిపింది.

ప్రపంచవ్యాప్తంగా ధ్రువీకరించిన రూ.4 కోట్ల విలువైన డయాగ్నొస్టిక్ కిట్లను దక్షిణ కొరియా నుంచి దిగుమతి చేసుకున్నట్లు వివరించింది. వీటి సాయంతో 25 వేల మందికిపైగా చికిత్స అవసరాలను తీర్చవచ్చని హ్యూందాయ్​ పేర్కొంది.