ముడిచమురుకు కరోనా ముప్పు.. మూడేళ్ల కనిష్ఠానికి ధరలు

ప్రపంచవ్యాప్తంగా కరోనా వేగంగా వ్యాపిస్తున్న నేపథ్యంలో చమురు ధరలు భారీగా పడిపోయాయి. చమురు వినియోగం తగ్గిపోయినందున డిమాండ్​ తగ్గి.. ధరలు మూడేళ్ల కనిష్ఠానికి పడిపోతున్నాయి. దీని ప్రభావం ఆర్థిక వ్యవస్థపై తీవ్రంగా ఉంటుందని నిపుణులు అంటున్నారు.

అంతర్జాతీయ మార్కెట్లో ముడిచమురు ధరలు అంతకంతకూ తగ్గుతూ వస్తున్నాయి. ప్రపంచవ్యాప్తంగా కరోనా వేగంగా వ్యాప్తి చెందుతుండటమే ఇందుకు కారణం. ఫలితంగా చమురుకు డిమాండ్​ భారీగా తగ్గిపోయింది. ఇందుకు తగ్గట్లు ప్రధాన చమురు సంస్థల మధ్య ఉత్పత్తి తగ్గించాలనే ఒప్పందం కుదరకపోవడం ధరలు మరింత క్షీణిస్తున్నాయి.

అంతర్జాతీయ మార్కెట్లో బ్రెంట్​ 9 శాతం క్షీణిచింది. బ్యారెల్ ముడిచమురు ధర 45.50 డాలర్లకు చేరింది. 2017 తర్వాత ఈ స్థాయిలో ధరలు తగ్గడం ఇదే ప్రథమం. అమెరికాకు చెందిన వెస్ట్ టెక్సాస్ ఇంటర్మీడియేట్​ క్రూడ్​ బ్యారెల్​ ధర 41.11 డాలర్లకు చేరింది.

ఈ ఏడాది ఇప్పటికే మొత్తం మీద అంతర్జాతీయ మార్కెట్లో ముడిచమురు ధర 30 శాతం తగ్గింది. జనవరి 8న బ్యారెల్ ముడిచమురు ధర 71.75 డాలర్లను తాకింది. ప్రస్తుతం 45.50 డాలర్లకు చేరింది.

ఈ ప్రభావం చమురు సంస్థ ఆదాయం తగ్గే పరిణామాలకు దారితీసే అవకాశముంది.

"ప్రపంచ ఆర్థికంపై కరోనా తీవ్ర ప్రభావం చూపనుంది. ఇంధన సంస్థలపైనా దీని ప్రభావం ఎక్కువ ఉండే అవకాశముంది. వీటికి తోడు చమురు ఉత్పత్తి దేశాల మధ్య ఉత్పత్తి తగ్గించే ఒప్పందం కుదరలేదు. డిమాండ్​కు తగ్గట్లు ఉత్పత్తి తగ్గించాలన్న ప్రతిపాదనకు రష్యా అంగీకరించలేదు."

-అనూజ్​ గుప్తా, ఏంజెల్ బ్రోకింగ్​ ఉపాధ్యక్షుడు

ఇదీ చూడండి:ఎస్​ బ్యాంకు సంక్షోభంలో 'రానా' పాత్రెంత?