జీహెచ్ఎంసీ కార్యాలయంలో రెవెన్యూ అభివృద్ధి, సాఫ్ హైద‌రాబాద్- షాన్‌దార్ హైద‌రాబాద్ కార్యక్రమం నిర్వహ‌ణ, పౌర ఫిర్యాదుల పరిష్కారం త‌దిత‌ర అంశాల‌పై జోన‌ల్‌, డిప్యూటీ క‌మిష‌న‌ర్లతో జీహెచ్ఎంసీ కమిషనర్ దానకిశోర్ సమీక్ష స‌మావేశం నిర్వహించారు. జీహెచ్ఎంసీ ప‌రిధిలో 1200 రూపాయల నుంచి ల‌క్ష రూపాయ‌లలోపు ఆస్తిప‌న్ను చెల్లించే నివాసాలన్నింటిని ప్రత్యేకంగా స‌ర్వే నిర్వహిస్తామని కమిషనర్ దానకిశోర్ పేర్కొన్నారు.
ఇళ్లలో వ్యాపార కార్యక్రమాలు..
గ్రేట‌ర్‌లో దాదాపుగా 16 ల‌క్షల నివాసాలు ఉన్నాయ‌ని, వీటిలో 2.60 ల‌క్షల నివాసాలు 1,200 రూపాయల నుంచి ల‌క్ష మేర ఆస్తిప‌న్నును చెల్లిస్తున్నాయని తెలిపారు. వీటిలో అధిక శాతం ఇళ్లలో వ్యాపార, వాణిజ్య కార్యక్రమాలు నిర్వహిస్తున్నార‌ని.. ఈ అంశంలో నివాసేత‌ర భ‌వ‌నాల‌న్నింటినీ.. వాణిజ్య పన్నుల పరిధిలోకి తేవాల‌ని కమిషనర్ ఆదేశించారు. జీహెచ్ఎంసీ సిబ్బంది ఇంటింటికి తిరిగి ఆస్తుల ఫొటోలు తీసి వాటి వివ‌రాల‌ను సేక‌రిస్తార‌ని అన్నారు. స‌ర్వే పురోగ‌తిని ప్రతిరోజు జోన‌ల్‌, డిప్యూటీ కమిష‌న‌ర్లు స‌మీక్షించాల‌ని కమిషనర్ ఆదేశించారు.