తెలంగాణ రాజకీయాల్లో తనదైన ముద్ర వేసి.. విపక్షాలను కోలుకోలేని దెబ్బతీసిన గులాబీ దళపతి.. తాజాగా దిల్లీ పీఠం దిశగా వేగంగా పావులు కదుపుతున్నారు. దేశవ్యాప్తంగా జరుగుతున్న పార్లమెంట్ ఎన్నికల ప్రచారంలో భాజపా, కాంగ్రెస్లు నిమగ్నమవగా... కేసీఆర్ మాత్రం ఫెడరల్ ఫ్రంట్ బలోపేతం దిశగా ముందుకు సాగుతున్నారు. అన్నీ కలిసి వస్తే తదుపరి కేంద్ర ప్రభుత్వ ఏర్పాటులో ఫెడరల్ ఫ్రంట్ నిర్ణయాత్మక పాత్ర పోషించే సూచనలు కనిపిస్తున్నాయి.
స్పష్టమైన లెక్కలతో..
ఇప్పటి వరకు పార్లమెంట్ ఎన్నికలు జరిగిన రాష్ట్రాల్లో జాతీయ పార్టీల గెలుపోటములపై స్పష్టమైన లెక్కలు వేసిన కేసీఆర్... కేంద్ర రాజకీయాల్లో తెలంగాణ ముద్ర ఉండేందుకు అవసరమైన కార్యచరణను ప్రారంభించారు. ఎన్నికలు పూర్తైన రాష్ట్రాల్లోని ముఖ్యనేతలతో చరవాణి ద్వారా సంప్రదింపులు జరిపి సమాచారం సేకరించారు. యూపీఏ, ఎన్డీఏ కూటమిలకు దూరంగా ఉన్న కమ్యూనిస్టులు, ఇతర విపక్షాలను ఏకం చేసేందుకు ప్రయత్నం చేస్తున్నారు. ఏ ఏ రాష్ట్రాల్లో ఏ ఏ పార్టీకి ఎన్నిసీట్లు వస్తాయి. ఎవరెవర్నీ కలిస్తే తమకు లాభం చేకూరుతుందనే అంశాలపై ప్రధానంగా దృష్టి సారించారు.
దిల్లీ గద్దెపై పట్టుకోసం..
దక్షిణాది రాష్ట్రాల పర్యటనకు శ్రీకారం చుట్టిన కేసీఆర్ మెుదటగా కమ్యూనిస్టుల కంచుకోట అయిన కేరళకు వెళ్లారు. ఆ రాష్ట్ర ముఖ్యమంత్రి పినరయి విజయన్తో ఏకాంతంగా చర్చలు జరిపారు. ఫెడరల్ ఫ్రంట్కు మద్దతు ఇవ్వాలని విజ్ఞప్తి చేశారు. మారుతున్న రాజకీయాలకు అనుగుణంగా కమ్యూనిస్టులు కలిసి రావాలని కోరారు. గత పాలకులైన భాజపా, కాంగ్రెస్ వల్ల దేశానికి ఒరిగిందేమీ లేదని.. ఇప్పటికి దేశంలో కరెంటు, నీళ్లు లేని పల్లెలు ఉన్నాయంటే అది గత పాలకుల పాపమే అని కేసీఆర్ పలు సందర్భాల్లో వ్యాఖ్యానించిన విషయం విదితమే. ఇప్పటికే మమతా బెనర్జీ, దేవెగౌడ, కుమారస్వామి, నవీన్ పట్నాయక్ లాంటి సీనియర్ నేతలను కేసీఆర్ స్వయంగా కలిశారు. వైకాపా అధినేత జగన్తో కేసీఆర్ తనయుడు కేటీఆర్ సైతం చర్చలు జరిపిన విషయం తెలిసిందే. పార్లమెంట్ ఎన్నికల ఫలితాలలోపే దేశవ్యాప్తంగా ప్రాంతీయ పార్టీల నేతలతో చర్చలు జరిపి..కలిసి వచ్చే వారందర్నీ ఏకతాటిపైకి తీసుకొచ్చి... దిల్లీ గద్దెపై ప్రాంతీయ పార్టీల సత్తా చాటేందుకు గులాబీ దళపతి సమాయత్తమవుతున్నారు.
ఇవీ చూడండి:సీఎం కేసీఆర్ - స్టాలిన్ భేటీపై ఉత్కంఠ
