బాలికకు తాళి కట్టిన యువకుడు.. వీడియో వైరల్!​

పాఠశాల విద్యార్థినికి తాళి కట్టిన యువకుడిని పోలీసులు అరెస్ట్​ చేశారు. మూడుముళ్లు వేసే సమయంలో తీసిన వీడియో సామాజిక మాధ్యమాల్లో వైరల్​గా మారిన క్రమంలో చర్యలు చేపట్టారు. విద్యార్థినిని ఊటిలోని బాలికల సంక్షేమ గృహానికి తరలించారు.

పాఠశాల విద్యార్థినికి ఓ యువకుడు తాళి కట్టిన సంఘటన ఆలస్యంగా వెలుగులోకి వచ్చింది. ఏడాది క్రితం బాలికకు పసుపుతాడు కడుతున్న సమయంలో తీసిన వీడియో సామాజిక మాధ్యమాల్లో వైరల్​గా మారింది. ఓ ఆలయం వెనకకు తీసుకెళ్లి తాళి కడుతున్న దృశ్యాలు అందులో ఉన్నాయి. అది చూసిన నెటిజన్లు.. ఆగ్రహం వ్యక్తం చేస్తున్నారు. సదరు యువకుడిపై చర్యలు తీసుకోవాలని అధికారులను కోరారు.

ఈ ఘటనపై ఊటికి చెందిన సాంఘీక సంక్షేమ శాఖ విభాగం.. కూనూర్​ మహిళా పోలీస్​ స్టేషన్​లో ఫిర్యాదు చేసింది. ఈ మేరకు యువకుడిని అరెస్ట్​ చేశారు పోలీసులు.

నిందితుడు

ఈ కేసును పోలీసులతో పాటు చైల్డ్​ హెల్ప్​లైన్​ అధికారులు దర్యాప్తు చేపట్టారు. వీడియోలో ఉన్న యువకుడిని సుత్తోన్​ ఎస్టేట్​ ప్రాంతానికి చెందిన గౌతమ్​గా గుర్తించారు. నిందితుడు కోయంబత్తూర్​లోని ఓ ప్రైవేటు కంపెనీలో పని చేస్తాడని వివరించారు. బాలిక తన తండ్రితో నమ్మక్కల్​లో ఉంటారని పేర్కొన్నారు.

బాల్య వివాహాల నిరోధక చట్టం కింద యువకుడిని అరెస్ట్​ చేసిన పోలీసులు.. బాలికను ఊటిలోని బాలికల సంక్షేమగృహానికి తరలించారు.