ఆసియాలో అతిపెద్ద బయో సీఎన్​జీ ప్లాంట్​కు మోదీ శ్రీకారం

Bio CNG plant in Indore: ఇందోర్‌లో ఆసియాలో అతిపెద్ద (బయో-సీఎన్‌జీ) ప్లాంట్‌ను ప్రారంభించారు ప్రధాని నరేంద్ర మోదీ. వ్యర్థ రహిత నగరాల నిర్మాణమే లక్ష్యంగా 550 టన్నుల సామర్థ్యం గల ప్లాంట్​ను వర్చువల్​గా ప్రారంభించారు.

Bio CNG plant in Indore: మధ్యప్రదేశ్​ ఇందోర్​లో ఆసియాలోనే అతిపెద్ద గోబర్​-ధన్ (బయో సీఎన్​జీ) ప్లాంట్​ను ప్రారంభించారు ప్రధాని నరేంద్ర మోదీ. వ్యర్థ రహిత నగరాల నిర్మాణమే లక్ష్యంగా 550 టన్నుల సామర్థ్యం గల ప్లాంట్​ను వర్చువల్​గా వేదికగా ప్రారంభించారు. వ్యర్థాలతో సంపద సృష్టిలో భాగంగా ఈ ప్లాంట్​ను ఏర్పాటు చేశారు. దీనికి గోవర్ధన్​ ప్లాంట్​ అని పేరు పెట్టారు. ఈ సందర్భంగా మాట్లాడిన మోదీ.. కాలుష్య నివారణలో బయో సీఎన్​జీ కీలక పాత్ర పోషిస్తుందని చెప్పారు. క్లీన్​ ఎనర్జీకి దోహదపడుతుందన్నారు.

"దశాబ్దాలుగా వేలాది ఎకరాల్లో లక్షల టన్నుల చెత్త పేరుకుపోయింది. దీని వల్ల గాలి, నీరు కలుషితమై వ్యాధులు వ్యాప్తికి కారణమవుతోంది" అని మోదీ పేర్కొన్నారు. అందుకే స్వచ్ఛ భారత్​ మిషన్​ రెండో దశలో ఈ సమస్యను పరిష్కరిస్తున్నట్లు తెలిపారు.

ఏడేనిమిదేళ్ల కిందట పెట్రోల్‌లో ఇథనాల్ కలపడం 1-2 శాతం మాత్రమే ఉండేదని.. అది ఇప్పుడు 8 శాతానికి చేరుకుందని ప్రధాని వెల్లడించారు. బొగ్గు ఆధారిత విద్యుత్ ప్లాంట్‌ల్లో వ్యవసాయ వ్యర్థాలను ఉపయోగించాలని బడ్జెట్‌లో నిర్ణయించినట్లు మోదీ తెలిపారు. తద్వారా రైతుల కష్టాలు తొలగుతాయని.. వారికి అదనపు ఆదాయం కూడా లభిస్తుందన్నారు.

ఇందోర్​ పరిశుభ్రతకు మారు పేరుగా మారిందన్న మోదీ.. ఇందుకు ప్రజలకు కీలక పాత్ర పోషించారని, నగరాన్ని అద్భుతంగా తీర్చిదిద్దారని కితాబిచ్చారు. దీంతో వరుసగా ఐదుసార్లు స్వచ్ఛమైన నగరంగా అగ్రస్థానంలో నిలిచిందన్నారు.

ప్రయోజనాలు..

• ఈ ప్లాంట్‌ను రోజుకు 550 టన్నుల తడి సేంద్రీయ వ్యర్థాలను శుద్ధి చేసే సామర్థ్యంతో నిర్మించారు. ఇది రోజుకు 17,000 కిలోల సీఎన్‌జీని, 100 టన్నుల సేంద్రీయ ఎరువులను ఉత్పత్తి చేస్తుందని పీఎంఓ తెలిపింది.
• ఈ ప్లాంట్​.. జీరో-ల్యాండ్‌ఫిల్​ మోడల్‌పై ఆధారపడి ఉంటుంది. ఇది బహుళ పర్యావరణ ప్రయోజనాలను ఇస్తుంది. గ్రీన్‌హౌస్ వాయు ఉద్గారాలను తగ్గిస్తుంది. గ్రీన్ ఎనర్జీని అందిస్తుంది.

ఇదీ చూడండి:భారత్‌పై మళ్లీ దావూద్‌ గురి.. దేశవ్యాప్తంగా దాడులకు కుట్ర..