జైలులో కుమారుడ్ని కలిసేందుకు డ్రగ్స్​తో వెళ్లిన తల్లి

జైలులో ఉన్న కుమారుడికి డ్రగ్స్ సరఫరా చేసేందుకు ప్రయత్నించిన మహిళను పోలీసులు అదుపులోకి తీసుకున్నారు. ఈ ఘటన కర్ణాటకలో జరిగింది.

జైలులో ఉన్న కుమారుడికి డ్రగ్స్ సరఫరా చేసేందుకు ప్రయత్నించింది ఓ తల్లి. ఈ ఘటన కర్ణాటకలో జరిగింది. నిందితురాలు పర్వీన్ తాజ్​ను పరప్పన అగ్రహార పోలీసులు అరెస్ట్ చేశారు. ఆమె కుమారుడు మహమ్మద్​ బిలాల్​పై 11 దోపిడీ కేసులు నమోదయ్యాయి. అందువల్ల బిలాల్‌ను కోననకుంటె పోలీసులు అరెస్టు చేసి పరప్పన అగ్రహార జైలుకు తరలించారు.

కొడుకును చూసేందుకు పర్వీన్ తరచూ జైలుకు వచ్చేది. అయితే జూన్ 13న పరప్పన అగ్రహార జైలుకు వచ్చిన ఆమె.. ఆ సమయంలో ఓ బాక్సుతోపాటు బట్టల బ్యాగ్​ను తెచ్చింది. జైలు సిబ్బంది తనిఖీలు నిర్వహించగా ఆ బ్యాగ్​లో రూ.5 లక్షల విలువైన హాషీష్​ ​ఆయిల్ బయటపడింది. వెంటనే జైలు సిబ్బంది పరప్పన అగ్రహార పోలీసులకు సమాచారం అందించగా.. నిందితురాలు పర్వీన్​ను అదుపులోకి తీసుకున్నారు.

'జైల్లో ఉన్న వ్యక్తికి నా కొడుకు బట్టల బ్యాగ్ ఇవ్వాల్సి ఉందని ఎవరో నాకు ఫోన్ చేసి చెప్పారు. అందుకే బ్యాగ్ ఇచ్చేందుకు అంగీకరించాను' అని పోలీసుల విచారణలో నిందితురాలు పర్వీన్​ చెప్పింది. బ్యాగ్‌లో ఉన్న డ్రగ్స్ గురించి తనకు తెలియలేదని పోలీసులకు తెలిపింది. నిందితురాలి​ వాంగ్మూలం, మొబైల్ కాల్స్ ఆధారంగా తదుపరి విచారణ జరుపుతున్నట్లు పోలీసులు తెలిపారు.

ఇవీ చదవండి:బాలికపై ఏడుగురు సామూహిక అత్యాచారం.. నిందితుల్లో నలుగురు మైనర్లు!